Претставниците на Финска и Ирска ја изразија својата поддршка за евроатлантскиот пат на Косово, по средбата одржана со косовскиот вицепремиер за европска интеграција, развој и дијалог, Бесник Бислими во Владата на Косово.
Вицепремиерот Бислими, кој ги прими делегациите од двете земји предводени од финската министерка за европски прашања и управување со имот, Тити Тупураинен и државниот министер за европски прашања на Ирска, Томас Бирн, истакна дека високо ја ценел континуираната поддршка на двете пријателски земји за поддршка на Косово кон визна либерализација, европските интеграции, членството во Европскиот совет, НАТО и другите меѓународни организации.
„Се надеваме дека брзото членство на Финска во НАТО ќе заврши успешно и ќе биде проследено со членство на Косово. Остануваме обединети во одбраната на заедничките вредности на слободата и мирот на нашиот континент“, нагласи Бислими.
Бислими рече дека треба да се зајакнат односите на Косово со државите Финска и Ирска и на социо-економско поле, нагласувајќи дека гледаат простор за зголемување на извозот на Косово во Финска и Ирска, но и зголемување на директните инвестиции од овие две земји во Косово.
Финската министерка Тупураинен рече дека Финска ги поддржува сите аспирации на Косово на евроатлантскиот пат.
„Финска ја поддржува визната либерализација на Косово и се надеваме дека ЕУ конечно ќе го реши овој проблем во наредните месеци. Време е сега и ние силно го поддржиме Косово. За нас Косово е позитивен пример за активен и конструктивен член на меѓународниот поредок“, нагласи Тупураинен, поздравувајќи ја одлуката на Косово за воведување санкции кон Русија по војната во Украина.
Таа рече дека го цени неодамнешниот договор меѓу Косово и Србија за енергетика во рамките на процесот на дијалог, притоа додавајќи дека „Финска ги поддржува сите напори за изнаоѓање заеднички и прифатливи решенија за нормализација на односите“.
Ирскиот државен министер за европски прашања, Томас Бирн, рече дека Ирска го поддржува евроатлантскиот пат на Косово.
Бирн рече дека и Ирска е за членство на Косово во Советот на Европа.
„Вашата влада или државата Косово бара членство во Советот на Европа и ова е одлично уверување за граѓаните дека оваа влада е сериозна во поглед на човековите права и дека ги ставила човековите права на прво место“, нагласи Бирн.
Република Косово на 12 мај годинава официјално аплицираше за членство во меѓународната организација Совет на Европа, со седиште во Стразбур, Франција.
Можноста за апликација на Косово за членство во Советот на Европа беше отворена на 16 март годинава, кога и официјално беше исфрлена Руската Федерација од оваа институција, поради војната во Украина.
Во отсуство на Русија, две третини од земјите-членки на оваа организација кои ја признаваат независноста на Косово, му даваат вистинска можност за членство.
