Шефот на Канцеларијата за комуникации при Кабинетот на претседателот на Туркије Фахретин Алтун изрази сочуство за турските војници кои загинаа во операцијата во северен Ирак и им посака брзо закрепнување на ранетите војници.
„Одлучно ќе ја продолжиме нашата борба додека не се искоренат сите форми на терористички организации и нема да ја заборавиме крвта на ниту еден од нашите маченици“, рече Алтун на социјалните мрежи.
„Илјада пати да бидат проколнати сепаратистичкиот тероризам и неговите поддржувачи, кои се заеднички непријател на човештвото“, додаде тој.
Министерството за одбрана на Турција соопшти дека пет турски војници загинале, а осум се ранети во судир со терористи кои се обидувале да се инфилтрираат во областа каде што се наоѓа базата во регионот на операцијата „Канџа-Катанец“ на северот на Ирак.
„Во конфликтот со терористите кои се обидуваа да се инфилтрираат во базата на 12 јануари загинаа пет наши храбри војници, а осуммина беа ранети, од кои тројца потешко. Ранетите војници се префрлени во болница“, соопшти Министерството.
Според првичните информации, за време на конфликтот биле неутрализирани 12 терористи.
Турското Министерство за одбрана соопшти дека операциите во регионот продолжуваат.
Туркије започна серија операции против ПКК во северен Ирак од 2020 година, а последната операција „Канџа-Катанец“ беше започната во април 2022 година, насочена кон засолништата на терористите на ПКК во северните ирачки области, особено во областа Метина, Зап и Авасин- Басјана.
Претходно, операциите на Туркије „Канџа-тигар“ и „Канџа-орел“ беа започнати во 2020 година за да се обезбеди безбедноста на турскиот народ и границите преку неутрализирање на заканата од ПКК и други терористички групи кои го користат северот на Ирак за да планираат вкрстени гранични напади.
ПКК е сепаратистичка организација која е наведена како терористичка група во Туркије, Европската Унија и Соединетите Американски Држави.
За време на повеќедецениската терористичка кампања против Турција, терористите на ПКК убија најмалку 40.000 луѓе.
