Американскиот претседател Џо Бајден ја поздрави американската потпретседателка и претседателски кандидат Камала Харис како иднина на партијата, повикувајќи ги Американците да гласаат за неа на отворањето на Демократската национална конвенција во Чикаго во понеделникот.
Бајден се обрати пред учесниците на конвенцијата, каде треба да се официјализира кандидатурата на Камала Харис за претседателската функција.
Помалку од еден месец по повлекувањето од трката, Бајден беше пречекан и поздравен како херој на конвенцијата.
Говорот на Бајден официјално го објави нивната ќерка Ашли Бајден, а аплаузот пред неговиот говор траеше три минути.
Публиката извикуваше: „Те сакаме Џо“, на што тој одговори дека и тој ги сака нив и дека ја сака Америка.
„Да ве прашам: Дали сте подготвени да гласате за слобода? Дали сте подготвени да ги избереме Камала Харис и Тим Волц?“, праша Бајден.
Тој рече дека демократите се собраа во 2020 година за да ја спасат демократијата.
„Демократијата победи. Ние ја донесовме демократијата. А сега демократијата мора да се зачува. Се соочуваме со пресвртница. Еден од оние ретки моменти во историјата кога одлуките што ги носиме сега ќе ја одредат судбината на нашата нација и на светот во децениите што доаѓаат. Ова не е хипербола, мислам буквално, ние се бориме за душата на Америка“, рече Бајден.
Тој рече дека не е Трамп и дека нема да ги демонизира имигрантите, за кои републиканскиот кандидат тврди дека ја „отруле крвта на Америка“.
Бајден зборуваше и за завршување на војната во Газа и за тоа како го напишал мировниот договор за Газа и дека работи деноноќно за да стави крај на страдањата на палестинскиот народ.
„Оние демонстранти на улица, тие имаат право. Многу невини луѓе гинат од двете страни“, рече Бајден.
Тој додаде дека Харис е најдобрата личност да ја заврши работата што ја започна – да го победи републиканскиот ривал Доналд Трамп и да ја заштити американската демократија од него.
На почетокот на конвенцијата, Камала Харис ненадејно се појави на сцената и накратко ги поздрави делегатите.
„Ова ќе биде прекрасна недела. Сакам да започнам со поздравување на нашиот претседател, на кого сме вечно благодарни. Сакаме да се бориме за идеалите кои ни се при срце. Кога се бориме, победуваме", рече таа.
На првата вечер од конвенцијата, пред делегатите се обрати поранешната државна секретарка Хилари Клинтон, која беше првата жена кандидат на претседателските избори во САД во 2016 година, кога беше поразена од Трамп.
„Во 2016 година имав чест да ја прифатам номинацијата на нашата партија за претседател, а речиси 66 милиони Американци гласаа за иднина во која нема граници за нашите соништа. Дури и после тоа, ние одбивме да се откажеме од Америка. Милиони протестираа. Многумина се кандидираа за функции. Гледавме во иднината, мои пријатели, иднината е тука“, рече Хилари Клинтон.
Таа истакна дека Камала Харис е идеалниот кандидат, бидејќи, како што наведе, се грижи за децата и семејството и Америка, додека Трамп се грижи само за себе.
Пред демократите се обрати и тренерот на американскиот кошаркарски „Дрим Тим“ Стив Кер, кој рече дека на Олимписките игри во Париз водел одличен тим составен од играчи од цела САД и дека кога го освоиле златото, американското знаме и националната химна беа за него најгордиот момент во животот.
Демократската конвенција завршува во четврток.
На конвенцијата денеска треба да говорат поранешниот претседател Барак Обама и сопругот на Камала Харис, Даг Емхоф, а утре кандидатот за потпретседател Тим Волц.
Ројтерс јавува дека тогаш ќе зборува и поранешниот претседател Бил Клинтон.
Говорот на Камала Харис е закажан за четврток, кога се очекува и официјално да ја прифати кандидатурата, со што конвенцијата ќе заврши.
