Израелскиот политичар од крајната десница и министер за национална безбедност Итамар Бен-Гвир утрово упадна во џамијата Ал Акса во окупираниот Источен Ерусалим (Источен Кудс), опкружен со голем број израелски војници кои им забранија на Палестинците да го посетат светото место на муслиманите.
Официјален претставник од Одделот за исламски вакаф во Ерусалим за Анадолу изјави дека Бен-Гвир направил провокативна обиколка на дворното подрачје на светата џамија.
Официјалниот претставник, кој сакаше да остане анонимен, додаде дека израелските сили ги спречиле палестинските верници да влезат во џамијата Ал Акса за време на посетата на Бен-Гвир.
„Тој упадна во џамијата преку западната порта Ал-Мугарба, која обично ја користат илегалните еврејски доселеници за упаѓање во џамијата“, објави палестинската официјална новинска агенција Вафа, цитирајќи локални извори.
Бен-Гвир објави видео на својот профил на платформата X на кое се гледа како упаѓа во џамијата, истакнувајќи дека дошол да се моли за ослободување на израелските заробеници што се држат во Газа.
„Дојдов овде, на најважното место за државата Израел и народот на Израел, да се молам за враќање на киднапираните во нивниот дом“, рече Бен-Гвир и додаде: „Но без нелегитимен договор и предавање“, потврдувајќи го неговото отфрлање на каков било договор за прекин на огнот со палестинската група на отпорот Хамас за запирање на израелските напади врз Појасот Газа.
Ова е петти пат тој насилно да влезе во џамијата откако стана израелски министер во декември 2022 година.
Бен-Гвир, лидер на крајно десничарската Оцма Јехудит (Еврејска моќ), е познат по поттикнувањето на еврејските доселеници да упаѓаат во џамијата.
