САД и Велика Британија употребија непропорционална сила во Јемен, изјави во петокот турскиот претседател Реџеп Таип Ердоган.
Говорејќи пред новинарите по молитвата во Истанбул, Ердоган се осврна на нападите врз Јемен од страна на САД и Велика Британија.
„Сите овие акции вклучуваат употреба на непропорционална сила. Израел исто така користи несразмерна сила во Палестина. Сакаат да го претворат Црвеното Море во езеро од крв. Јемен изјавува дека ќе им го даде потребниот одговор во регионот, здружувајќи ги сите свои сили со Хутите“.
„Добиваме информации од различни извори дека Хутите направија многу успешна одбрана, дадоа успешни одговори и против САД и Велика Британија“, рече тој.
САД и Обединетото Кралство извршија напади врз повеќе цели во Јемен доцна во четвртокот како одговор на тековните напади со беспилотни летала и ракети од страна на Хутите, кои се поддржани од Иран, на меѓународните бродски патеки во Црвеното Море. Нападите на јеменската група започнаа во ноември како одговор на израелската војна против Газа.
Во врска со тужбата за геноцид од Јужноафриканската Република против Израел пред Меѓународниот суд на правдата, Ердоган рече дека израелскиот премиер Бенјамин Нетанјаху нема каде да се крие и дека нема одбрана за неговите постапки.
„Во овој момент би го видел израелскиот претседател Исак Херцог во многу поискрена атмосфера, но во последно време тој исто така го имитира Нетанјаху, почнувајќи да дава многу различни изјави“, додаде тој.
Ердоган истакна дека Израел ги презентира своите аргументи пред највисокиот суд на ОН, додавајќи: „Нодокументите што ги презентиравме се корисни за Хаг“.
Првиот ден од судењето заврши во четвртокот, откако амбасадорот на ЈАР во Амстердам, Вусимузи Мадонсела, ги прочита деветте привремени мерки што неговата земја ги побара од Судот против Израел.
На првиот ден од судењето, јужноафриканската страна ги презентираше своите наводи против Израел пред МСП заедно со придружните причини и докази.
Правните претставници за ЈАР во судскиот процес го обвинија Израел за „намерни дејствија против Газанците, докажувајќи геноцидна намера“.
