Европската унија очекува позитивен дијалог со новата американска администрација, изјавија во четвртокот претседателката на Европската комисија Урсула фон дер Лајен и претседателот на Европскиот совет Антонио Коста.
„Очекуваме позитивен дијалог со новата американска администрација заснован на нашите заеднички вредности и интереси. Во суров свет, Европа и САД се посилни заедно“, рекоа фон дер Лајен и Коста во координирана изјава објавена на социјалните мрежи.
Лидерите на институциите на ЕУ за првпат се изјаснија по серијата потези на новоизбраниот американски претседател Доналд Трамп, кои предизвикаа вознемиреност низ целиот континент.
Трамп во последните денови изјави дека ја сака Канада како 51-ва американска држава, потоа дека го сака Гренланд, остров во рамките на Данска, кој ужива голема автономија и контрола над Панамскиот канал.
Освен тоа, блискиот соработник на Трамп, најбогатиот човек на светот, Илон Маск, продолжува да се меша во политичките процеси во европските земји.
Х веќе со недели ја напаѓа британската влада на премиерот Кир Стармер на социјалните мрежи и отворено ја поддржува германската крајнодесничарска Алтернатива за Германија пред предвремените избори на 23 февруари.
Коста и фон дер Лајен наведуваат дека САД се еден од најблиските партнери на Европа и дека ЕУ е посветена на зајакнување на трансатлантските врски, но и дека секогаш ќе ги штити своите граѓани, интегритетот на своите демократии и слободата.
„Од суштинско значење е ЕУ да ги заштити и зајакне нашите основни демократски вредности, да ја направи нашата економија поконкурентна и одржлива, да ја прошири нашата глобална мрежа на партнерства и да инвестира повеќе во нашата безбедност. ЕУ секогаш ќе ги штити нашите граѓани и интегритетот на нашите демократии и слободи“, порачаа Фон дер Лајен и Коста.
