Европската Унија (ЕУ) нема да има „никаков избор освен да одговори цврсто и брзо“ доколку Соединетите Американски Држави (САД) воведат царини за стоките од блокот, изјави европскиот комесар за трговија и економска безбедност, Марош Шефчович.
„Ако САД воведат царини за производите на ЕУ, тоа би создало непотребни бариери за европскиот извоз, нанесувајќи им штета на бизнисите и работниците од двете страни. Затоа, со цел да ги заштитиме европските интереси, нема да имаме друг избор освен цврсто и брзо да одговориме“, рече Шефчович во својот говор во Институтот Американ ентерпрајз во Вашингтон.
Шефчович ги истакна економските односи меѓу ЕУ и САД, опишувајќи ги односите како „дефиниција за вин-вин партнерство и нешто во кое нема ништо нефер“.
Тој наведе многубројни примери на заемно корисна трговија, од „Боинг“ и „Ербас“ до потпирањето на американската индустрија за полуспроводници врз технологијата направена од ЕУ.
„ЕУ е најважен трговски партнер на САД“, рече тој.
„Во текот на изминатата деценија билатералната трговска размена меѓу ЕУ и САД во стоки и услуги се удвои, надминувајќи 1,7 билиони долари во 2023 година“, истакна Шефчович.
Повикувајќи на конструктивен дијалог за да се избегне „непотребната болка од мерки и контрамерки“, еврокомесарот ја потврди посветеноста на ЕУ за слободна и фер трговија.
„Трговијата не е војна. Тоа е економски сојуз од корист на двете земји“, нагласи тој.
