Извршниот директор на меѓународната организација Хјуман рајтс воч (ХРВ), Тирана Хасан денеска оцени дека враќањето на новоизбраниот американски претседател Доналд Трамп во Белата куќа следната недела ќе ги загрози слободите во таа земја и во странство.
Таа изјави дека вториот мандат на Трамп може да биде „поштетен од првиот“.
„Првиот мандат на администрацијата на Трамп ни покажа за што се тие способни, а особено го покажа нивниот недостаток на посветеност на човековите права. Но Проектот 2025 и изјавите што ги слушнавме од новоизбраниот претседател веќе почнаа да покажуваат дека ќе има некаков сеопфатен напад врз основните права на мигрантите“, рече Хасан.
Таа оцени дека реториката на Трамп може да ги поттикне „автократите ширум светот да воведат слични политики“.
Хасан, исто така, ја критикуваше администрацијата на претседателот во заминување Џозеф Бајден за големи испораки на оружје за Израел за време на нападот на таа земја врз Појасот Газа, и покрај „јасните докази дека тие биле користени за извршување злосторства“.
„Изминатата година не е нешто со што се гордее администрацијата во заминување“, рече Хасан.
Минатиот месец ХРВ соопшти дека Израел извршил чин на геноцид со тоа што ја лишил Газа од вода, тврдење кое Израел го негираше.
