Првичните неофицијални резултати од парламентарните избори кои вчера се одржаа во Шведска навестуваат формирање на нова влада и ново парламентарно мнозинство.
Информациите говорат за пораз на коалициската влада на партиите лево од центарот на чело со премиерката Магдалена Андерсон и формирање на десничарска влада. До сега се преброени 93 проценти од гласовите.
Десничарскиот блок во кој се Умерените, Шведските Демократи, Демохристијаните и Либералите би имале 176 места во шведскиот парламент Риксдаг. Владејачките партии во таква ситуација би имале 173 пратенички места од вкупно 349 во шведскиот Парламент. Сепак ваквите бројки не се конечни бидејќи гласовите се пребројуваат.
Лидерот на Умерената партија Улф Кристерсон даде свое мислење за причината за ваквите резултати.
„Во нашата земја во моментов има многу фрустрации, страв од насилство, загриженост за економијата. Подготвен сум да направам се што можам за да се создаде нова, стабилна и способна влада за цела Шведска и за сите граѓани“, изјави Кристерсон.
Премиерката Андерсон пак истакна дека конечните изборни резултати се уште се неизвесни.
„Можам да видам една работа во моментов. Ние социјалдемократите направивме добар избор. Поддршката за нас се зголеми и јасно е дека шведската социјалдемократија е силна”, изјави таа.
Предвидувањата претходно беа дека левиот блок предводен од владејачките социјалдемократи ќе добијат од 49,8 до 50,6 проценти од гласовите. Наспроти десничарскиот блок кој би освоил 49,2 проценти.
Изборната комисија на Шведска соопшти дека резултатот е тесен и нема да се знае пред среда кога ќе биде познат и исходот од гласовите на иселениците.
Зошто порасна рејтингот за антимиграциската партија?
Конзервативниот блок вклучува и антимиграциска партија која ги постигна најдобрите резултати досега со освоени околу 21 процент од гласовите.
Партијата на шведските Демократи ја стекна довербата кај гласачите со ветувањата дека ќе се справи со зголеменото насилство и ќе придонесе да се намалат причините кои предизвикуваат чувство на несигурност кај граѓаните.
Оваа партија има свои корени во белото националистичко движење кое се залагаше за протерување на екстремистичките групи. По формирањето ова движење на уживаше голема доверба кај граѓаните, но работите се сменија.
„Сега сме втората најголема партија во Шведска и се чини дека така ќе остане. Сега знаеме дека ако има промена на власта, ние ќе имаме централна улога во тоа. Нашата амбиција е да бидеме во владата”, изјави лидерот на партијата Џими Аксон, во обраќањето до неговите сопартијци.
Конзервативниот блок на изборите беше предводен од партијата Модерати која освои 19 проценти од гласовите.
Долг период за формирање влада
Како и да е без оглед на изборните резултати по се изгледа Шведска ќе се соочи со фолг процес на формирање влада. Сличен расплет имаше и по изборите во 2018 година.
Андерсон 55 годишна економистка стана првата жена премиер на Шведска. Таа беше предводник на кандидатурата на Шведска за влез во НАТО по отпочнувањето на руската агресија врз Украина.
