Кина соопшти дека ќе ги продолжи своите воени вежби во близина на Тајван. Последното соопштение значи дека Кина го продолжи времетраењето на големите воени вежби кои започнаа на 4 август и требаше да завршат оваа недела.
Во соопштението, командата на Источната воена област на Народноослободителната армија (ПЛА) посочи дека „ќе продолжи со вежбите во водите во близина на островот Тајван, фокусирајќи се на напади против подморници и против поморски напади од воздух“, пренесува кинескиот дневен весник „Глобал Тајмс“.
Воените вежби беа одржани од Кина како одговор на посетата на претседателката на Претставничкиот дом на САД, Ненси Пелоси на Тајван против предупредувањата издадени од Пекинг, кој го гледа самоуправуваниот остров како своја „отцепена провинција“.
Кинеската војска исто така лансираше балистички ракети околу Тајван, од кои некои паднаа во водите за кои Јапонија тврдеше дека се нејзина ексклузивна економска зона.
Министерство за одбрана на Тајван, исто така, се очекува да одржи прес-конференција во текот на денот.
Пекинг, исто така, го оправда намалувањето на својот воен дијалог со САД.
Ву Чиан, висок полковник и портпарол на кинеското Министерство за национална одбрана, ги обвини САД за актуелните „напрегања во Тајванскиот теснец“.
„САД ги испровоцираа“, рече Ву, додавајќи дека „контрамерките“ на Кина, вклучително и откажувањето на дијалогот на ниво на команда на воениот фронт за оваа област „се оправдани и правилни“.
„САД намерно создаваат криза, а во исто време прават изговор да ја префрлат вината на другите, на што Кина цврсто се противи. Ги повикуваме САД да ги почитуваат основните интереси и грижи на Кина, да се откажат од користење на островот Тајван за да се спротивстават на Кина“, рече Ву во изјавата.
Како дел од своите контрамерки против патувањето на Пелоси, Пекинг ја санкционираше претседателката на Претставничкиот дом на САД, нејзиното семејство и најави осум чекори за суспендирање или откажување на соработката со Вашингтон.
Осумте контрамерки што ги објави Пекинг вклучуваат откажување на телефонскиот разговор меѓу началниците на војската на САД и Кина, откажување на работниот состанок меѓу Министерството за одбрана на Кина и САД и прекин на соработката меѓу Кина и САД за илегални имигранти, контрола на наркотици и климатски промени.
Пелоси е првата претседателка на Претставничкиот дом на САД која го посети Тајван во последните 25 години.
Таа ја предводеше делегацијата на американски пратеници кои го започнаа своето патување од Сингапур минатата недела, по што следеше Малезија од каде што отпатува за Тајван, што предизвика лут одговор од Пекинг.
Таа го напушти Тајван во средата навечер за Јужна Кореја и конечно слета во Токио во четвртокот вечерта за да ја заврши својата посета во петок.
Тајван не беше споменат во агендата на официјалната турнеја на Пелоси.
