Состанокот меѓу рускиот и американскиот претседател би можел да се одржи веќе следната недела, соопшти Кремљ денеска.
“Владимир Путин и Доналд Трамп би можеле да се сретнат пред крајот на февруари”, изјави портпаролот на Кремљ Дмитриј Песков на брифинг со новинарите во Москва. Но, тој не ја исклучи можноста за подоцнежен датум, нагласувајќи дека за организирање на такви разговори на високо ниво е потребно време и опсежна подготовка од страна на руското Министерство за надворешни работи.
Песков зборуваше и за руско-американските преговори во Саудиска Арабија, велејќи дека примарен фокус е обновувањето на билатералните односи.
„Главната задача сега е токму она што се случува во овој момент. Оваа тема првенствено е поврзана со заживување на односите, проследено со нивно целосно обновување“, забележа тој.
Руско-американските односи беа залaдени за време на претседателот Џо Бајден, особено по февруари 2022 година, кога започна војната во Украина. За време на неговиот претходен претседателски мандат во 2017-2021 година, Трамп беше познат по неговите пријателски односи со Путин. Трамп минатиот месец се врати во Белата куќа.
Песков истакна дека поправањето на врските меѓу Москва и Вашингтон ќе биде постепен процес, кој бара постојан дипломатски напор.
„Невозможно е да се поправи сè за еден ден, па дури и за една недела. Патот пред нас е долг, а останува уште многу работа да се заврши. Сепак, клучен прв чекор беше направен вчера“, рече тој.
Песков додаде дека иако е прерано да се извлечат дефинитивни заклучоци од разговорите, првичниот напредок е охрабрувачки: „Импулсот е многу позитивен, а целокупниот став останува деловен“.
Разговорите меѓу Русија и САД во Саудиска Арабија беа организирани за решавање на прашањата за поправање на односите, решавање на конфликтот во Украина и подготовка на средба меѓу рускиот и американскиот претседател.
