Рускиот претседател Владимир Путин е отворен за дијалог со новоизбраниот американски претседател Доналд Трамп, изјави во петокот портпаролот на Кремљ, Дмитриј Песков.
Песков рече дека во моментов не се направени конкретни аранжмани за средба меѓу Путин и Трамп.
„Како што сите слушнавме, г-дин Трамп за време на кампањата навести дека ќе контактира со претседателот Путин. Отвореноста за дијалог сѐ уште постои, како што нагласи вчера рускиот претседател“, објасни Песков.
Рускиот претседател Владимир Путин во четвртокот му ја честиташе победата на Доналд Трамп на претседателските избори во САД, одржани на 5 ноември.
„Би сакал да ја искористам оваа прилика да му честитам за неговиот избор за претседател на Соединетите Американски Држави. Веќе реков дека ќе соработуваме со секој шеф на држава на кој американскиот народ има доверба“, рече Путин во Сочи.
Тој додаде дека е „импресиониран“ од однесувањето на Трамп за време на два обиди за атентат оваа година и го опиша новоизбраниот претседател на САД како „храбар човек“.
Во неодамнешното интервју за Ен-Би-Си, Трамп призна дека се уште не разговарал со Путин, иако не ја отфрли можноста.
Зборувајќи за односите меѓу САД и Кина, Песков рече дека Кремљ ќе ги процени економските акции на Трамп кон Пекинг врз основа на опипливи резултати.
Зборувајќи за ситуацијата во Украина, Песков ја повтори подготвеноста на Русија да се вклучи во дијалог за резолуцијата, потврдувајќи дека целите на нејзината „специјална воена операција“ остануваат непроменети.
Песков, исто така, ја нагласи отвореноста на Путин за дијалог со сите страни заинтересирани да помогнат во решавањето на конфликтот, кој трае од 2022 година. Тој исто така рече дека Путин често ја нагласува својата посветеност за постигнување на целите на воената кампања преку мирни средства, доколку е можно.
