Израелскиот премиер Бенјамин Нетанјаху размислува да избегне застанување во Европа на пат кон Соединетите Американски Држави (САД) поради стравувањата дека Меѓународниот кривичен суд (МКС) е подготвен да издаде налог за негово апсење поради злосторствата на израелската војска во Газа.
Планирано е Нетанјаху да отпатува за САД и да одржи говор пред американскиот Конгрес на 24 јули. Тој, исто така, се очекува да се сретне со американскиот претседател Џо Бајден во Белата куќа.
На 20 мај обвинителот на МКС, Карим Кан, побара налози за апсење на Нетанјаху и министерот за одбрана Јоав Галант за воени злосторства и злосторства против човештвото во Појасот Газа. Кан, исто така, побара налози за тројца од водечките лидери на групата Хамас, вклучително и за нејзиниот шеф Исмаил Ханије.
Израелскиот јавен сервис КАН соопшти дека кабинетот на Нетанјаху го разгледал прашањето за застанувањето во Европа на пат кон Вашингтон бидејќи неговиот авион, познат како „Винг оф Сион“, не може да изврши прекуокеански лет со товар и патници.
Неговата канцеларија ја разгледа опцијата за застанување во Чешка или Унгарија бидејќи овие две земји се сметаат за пријатели на Израел и барањата за апсење од МКС ги нарече „неприфатливи“, објави КАН.
Сепак, се истакнува дека канцеларијата на Нетанјаху на крајот одлучила да оди на директен лет за Вашингтон со ограничен број патници во авионот.
Иако САД не се членка на МКС, примањето на Нетанјаху и покрај меѓународната потерница може да ги изложи на критики.
Израел, исто така, не е член на судот, а Палестина беше прифатена како членка во 2015 година.
Меѓународниот кривичен суд (МКС), основан во 2002 година, е независно меѓународно тело што не е поврзано со Обединетите нации или некоја друга меѓународна институција, а неговите одлуки се обврзувачки.
Непочитувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа од нападот на Хамас на 7 октомври 2023 година.
Според локалните здравствени власти, оттогаш се загинати речиси 38.200 Палестинци, главно жени и деца, а над 87.900 се повредени.
Девет месеци по почетокот на израелската војна огромни делови од Газа се во урнатини, а има и блокада за храна, чиста вода и лекови.
Израел е обвинет за геноцид пред Меѓународниот суд на правдата, со чија последна пресуда му се нареди на Тел Авив веднаш да ја прекине својата операција во Рафа, каде што над еден милион Палестинци побараа засолниште од војната пред почетокот на копнената офанзива врз градот на 6 мај.
