Новоизбраниот претседател на Соединетите Американски Држави (САД), Доналд Трамп, има намера да преземе чекори за да обезбеди континуиран пристап до ТикТок и за да ги заштити податоците на корисниците, истакна Мајк Волц предложен за советник за национална безбедност.
„ТикТок, сам по себе, е фантастична платформа“, изјави Волц за Фокс њуз во синоќешното интервјуто.
„Алгоритмот е неверојатен. Ќе најдеме начин да го зачуваме, но да ги заштитиме податоците на корисниците“, додаде тој, мислејќи на американскиот закон со кој се бара од кинеските сопственици да им ја продадат платформата на американски сопственици или ќе биде забранета поради безбедносни грижи.
Во врска со таа безбедносна загриженост, тој додаде: „Ние секако не сакаме кинеската Влада да има увид во податоците и лозинките.“
Законот за ограничување на функционирањето на ТикТок во САД треба да стапи на сила во недела доколку Бајт Денс матичната компанија со седиште во Кина, не ја пренесе сопственоста или ако во последен момент не биде стопирана судската одлука.
Предложените мерки имаат цел да ја решат загриженоста за националната безбедност поради потенцијалното споделување податоци со кинеските власти, тврдења што Бајт Денс ги негира.
Трамп се противи на забраната и побара од Врховниот суд да направи итна ревизија на мерката.
Во првиот мандат како претседател од 2017 до 2021 година Трамп се залагаше за забрана, но го смени својот став кога делумниот сопственик на Бајт Денс стана еден од соработниците во неговата кампања.
