Вашингтон нема да дозволи Украина да пропадне, изјави денес американскиот министер за одбрана Лојд Остин во време кога републиканците во Конгресот го блокираат протокот на воена помош.
„Одлучни сме да ѝ ги обезбедиме на Украина ресурсите што ѝ се потребни за да се спротивстави на агресијата на Кремљ“, рече Остин на состанокот на високо ниво на сојузниците и партнерите на НАТО во воздухопловната база Рамштајн во Германија.
Тој изјави дека украинските трупи во моментов се соочуваат со „сурови услови и тешки борби“ и дека им треба повеќе оружје и муниција од западните земји за да се спротивстават на воената агресија на Русија.
„Украина нема да отстапи, а ниту САД. Значи, нашата денешна порака е јасна. САД нема да дозволат Украина да пропадне. Оваа коалиција нема да дозволи Украина да пропадне, а слободниот свет нема да дозволи Украина да пропадне“, рече Остин.
Нагласувајќи го новиот пакет за дополнителна безбедносна помош од 300 милиони долари што САД го објавија минатата недела, тој рече дека ќе ги поддржи најитните потреби на Украина за воздушна одбрана, артилерија и противтенковски капацитети.
Состанокот во Рамштајн доаѓа во услови на зголемена загриженост во Киев за одржливоста на американската воена поддршка за Украина, поради тоа што републиканците ја блокираа помошта за време на изборната година и веројатноста за втор мандат на поранешниот претседател Доналд Трамп.
Во текот на изминатите недели, украинскиот претседател Владимир Зеленски апелираше до западните сојузници за поголема поддршка и предупреди дека украинската Армија се соочува со критичен недостиг на муниција, особено артилериски гранати.
