Американските власти се сомневаат дека кинески хакери собрале податоци за стотици илјади американски корисници на мобилни телефони и дека веројатно преземале информации од повеќе од милион корисници за време на неодамна откриената кампања за хакирање и шпионажа, објави денеска Еј-Би-Си Њуз.
Според информациите на таа телевизија, меѓу жртвите на кинеските хакери биле и некои од највисоките владини функционери во администрацијата на претседателот на САД, Џозеф Бајден, а меѓу нив и најмалку еден секретар на неговиот кабинет, како и советник за внатрешна безбедност на Белата куќа.
Извори запознаени со истрагата на телевизијата ѝ дале детален преглед на огромниот опсег на, како што ја нарекоа американските официјални лица, големата операција за собирање разузнавачки информации од страна на Кина, која настана со искористување на слабостите во комуникациските мрежи на водечките американски телекомуникациски компании.
Функционери од Федералното биро за истраги (ФБИ) и домашната безбедност изјавија на вчерашната прес-конференција дека Кинезите успеале да украдат „голема количина на податоци“, официјално признавајќи за прв пат дека Кина успеала да утврди со кого разговарале илјадници корисници на мобилни телефони во САД, кога зборувале и од каде комуницирале.
Според презентираните податоци, Кина првично се фокусирала на огромниот број корисници на мобилни телефони во регионот на Вашингтон, а кинеските хакери потоа успеале да го намалат својот фокус и да се фокусираат на специфичните комуникации на мал број важни Американци од висок профил и, во некои случаи, успеале да добијат аудио повици од таа помала група жртви и прегледи на нивните СМС пораки.
Иако не е јасно до кој степен е достигнато шпионирањето на одредени цели, извори запознаени со истрагата изјавија за Еј-Би-Си Њуз дека голем број од тие високи владини функционери биле известени дека се потенцијални жртви.
Официјални лица на прес-конференција во вторникот признаа дека не можат со сигурност да кажат дека кинеските хакери се целосно исфрлени од телекомуникациските мрежи и дека сè уште се обидуваат да го утврдат степенот на нивната шпионска активност.
Истрагата откри дека кинеската кампања ги искористила американските компјутерски рутери кои им служат на телекомуникациските корпорации, што им овозможило пристап до телефонските броеви на значителен број клиенти на Веризон, AT&T, Лумен Технолоџис и други телекомуникациски компании и дека операцијата можеби траела повеќе од една година.
