Американското Министерство за правда соопшти дека двајца поранешни сириски разузнавачи од режимот на Башар ал Асад се обвинети за воени злосторства.
Според соопштението, поранешните офицери на сириските воздушни сили за разузнавање Џамил Хасан (72) и Абдул Салам Махмуд (65) се обвинети во врска со заговор за извршување воени злосторства преку нанесување суров и нехуман третман на затворениците под нивна контрола, вклучително и Државјани на САД, во притворни објекти на воениот аеродром Мезе, во близина на сирискиот главен град Дамаск.
Службениците остануваат на слобода, се вели во соопштението.
„Сторителите на злосторствата на режимот на Асад врз американските граѓани и другите цивили за време на сириската граѓанска војна мора да одговараат за нивните грозоморни злосторства“, рече државниот обвинител Мерик Гарланд.
„Како што се тврди, овие разузнавачки службеници на режимот на Асад ги камшикувале, клоцале, ги шокирале со струја и ги палеле нивните жртви; ги обесувале за нивните зглобови подолго време; им се заканувалe со силување и смрт; и лажно им кажалe дека членовите на нивното семејство биле убиени“, изјави Гарланд.
Според обвинението, Хасан бил директор на разузнавањето на сириските воздухопловни сили и ја надгледувал мрежата на објекти за притвор, додека Махмуд бил бригаден генерал во разузнавањето на сириските воздушни сили и ги насочувал операциите во затворот Мезе.
„Обвинението тврди дека помеѓу јануари 2012 и јули 2019 година, Хасан и Махмуд се заговарале да ги идентификуваат, заплашат, закануваат, казнуваат и убиваат луѓето притворени во затворот Мезе, осомничени за помагање или поддршка на противниците на режимот, како што се оние кои протестирале, пружале медицинска помош на противниците на режимот или јавно го критикуваа режимот“, се вели во соопштението.
Доколку бидат прогласени за виновни, секој од обвинетите се соочува со максимална казна доживотен затвор.
