Американскиот претседател Доналд Трамп денеска изјави дека имал долг и високо продуктивен разговор со неговиот руски колега Владимир Путин.
„Разговаравме за Украина, Блискиот Исток, енергијата, вештачката интелигенција, моќта на доларот и разни други теми“, објави Трамп на Truth Social.
Според Трамп секој од нив зборувал за силните страни на своите нации и за големата придобивка што некогаш ќе ја имаат при соработка.
„Но, прво, како што и двајцата се согласивме, сакаме да ги запреме милионите смртни случаи во руско-украинската војна. Се договоривме да работиме заедно, многу тесно, вклучително и меѓусебните посети на двете земји. Се договоривме и нашите тимови веднаш да започнат преговори и ќе го повикаме претседателот Зеленски за да го известиме за разговорот.
Трамп рече дека побарал од државниот секретар Марк Рубио, директорот на ЦИА Џон Ретклиф, советникот за национална безбедност Мајкл Валц и неговиот специјален пратеник Стив Виткоф да ги водат преговорите.
Претседателот додаде дека верува оти преговорите ќе бидат успешни.
Трамп го повтори своето тврдење дека војната меѓу Русија и Украина никогаш немаше да започне доколку тој беше претседател, нагласувајќи:
„Не треба повеќе да се губат животи!“
Тој, исто така, му се заблагодари на Путин за неговото време и напор во врска со повикот и ослободувањето на Марк Фогел, кој беше зад решетки во Русија од 2021 година, а Русија вчера го ослободи.
„Верувам дека овој напор ќе доведе до успешен заклучок, се надевам наскоро! - додаде Трамп.
