Потребно е единство меѓу Соединетите Американски Држави и Европската унија за да се запре рускиот претседател Владимир Путин и да се спаси Украина, изјави украинскиот претседател Володимир Зеленски.
Toj присуствува на Самитот на лидерите на ЕУ во Брисел, каде ситуацијата во Украина ќе биде една од главните теми.
„Главниот приоритет за нас, а за тоа ќе разговараме денеска, е заштитата на нашиот енергетски сектор. Зборувам, секако, за безбедноста на нуклеарната централа, која е многу опасна не само за Украина, туку и за цела Европа ако нешто тргне наопаку“, рече Зеленски.
Тој посочи дека за Украина и за Европејците е важна и заштитата на складиштето на гас, како и зголемувањето на военото производство, кое помага и функционира, што може да се забележи на бојното поле. Тој додаде дека важно прашање е како да се зголеми безбедноста во училиштата за украинските деца.
„Се работи за засолништа за бомби, храна, многу различни работи кои се многу важни за нашите семејства“, рече Зеленски.
Во заедничкото обраќање до медиумите со претседателот на Европскиот совет, Антонио Коста, Зеленски рече дека темата „Европа во светот“ е важна и за Украина.
„Тоа е многу важно за нас. Од самиот почеток на следната година ни треба силно единство меѓу САД, ЕУ и земјите од Европа. Ова единство е неопходно за да се постигне мир. Мислам дека само заедно САД и Европа навистина може да го запре Путин и да ја спаси Украина“, рече Зеленски.
Тој додаде дека е многу тешко да се поддржи Украина без американска помош, за што ќе разговара со новоизбраниот американски претседател Доналд Трамп кога ќе ја преземе функцијата.
Претседателот на Европскиот совет Антонио Коста изјави дека Украина може да смета на поддршката од Европската унија се додека тоа е потребно.
“Можете да сметате на нашата целосна поддршка сè додека е потребно, во војна, во иднина и во мир. Сакаме да ви посакаме добредојде овде еден ден како членка на Европската унија“, рече Коста пред состанокот на лидерите на ЕУ.
Во Брисел, лидерите на ЕУ, покрај Украина, ќе разговараат и за Блискиот Исток, отпорноста и подготвеноста на ЕУ, миграцијата и прашањата за надворешната политика.
