Новиот лек за астма, прв од ваков вид во последните 50 години, беше прогласен за „револуционерен“ од лекарите и пациентите, откако клиничкото испитување покажа дека лекот бенрализумаб е многу поефикасен од традиционалните таблети при третман на тешка астма.
Бенрализумаб е антитело што ги таргетира белите крвни зрнца, кои можат да ги нападнат белите дробови кај луѓето со еозинофилна астма, форма на болест што предизвикува оток и стеснување на дишните патишта.
Резултатите од клиничкото испитување покажаа дека пациентите со астма или хронични белодробни заболувања, кои примиле инјекција од овој лек за време на напад, имале помала веројатност да имаат отежнато дишење и други симптоми четири недели подоцна.
„Ова може да ја „промени играта“ за луѓето со астма и хронична опструктивна белодробна болест (ХОББ). Третманот за астма и егзацербации на ХОББ не е променет во последните 50 години, и покрај тоа што предизвикуваат 3,8 милиони смртни случаи во светот годишно“, рече водaчот на истражувањето, проф. Мона Бафадел од Кралскиот колеџ во Лондон
Според неа, Бенрализумаб е безбеден и ефикасен лек кој веќе се користи за справување со тешка астма, но тие го користеле лекот на поинаков начин.
„Лекот го дававме во моментот на егзацербација, односно напад за да покажеме дека е поефективен од стероидните таблети, што е единствениот третман во моментов достапен“.
Испитувањето опфатило 158 луѓе на кои им била потребна медицинска помош во Итната помош поради напад на астма или ХОББ.
На пациентите им бил направен брз тест на крвта за да се види каков тип на напад имаат, при што оние кои страдаат од „еозинофилна егзацербација“ биле погодни за лекување.
Според научниците, околу 50% од нападите на астма се еозинофилни егзацербации, како и 30% од нападите на ХОББ.
Испитувањето било спроведено во три групи во кои пациентите биле поделени по случаен избор.
Една група примила инјекција со бенрализумаб и лажни таблети. Друга група добила стандардна терапија со стероиди преднизолон, 30 мг дневно во текот на пет дена, и лажна инјекција. Третата група прими инјекција бенрализумаб и стероиди.
По 28 дена, беше откриено дека респираторните симптоми на кашлање, отежнато дишење, недостиг на воздух и спутум биле подобри кај оние кои земале бенрализумаб, без разлика дали биле на стероиди или не.
По 90 дена, четири пати помалку испитаници со бенрализумаб немале потреба од третман во споредба со оние кои примале стероиди.
Третманот со инјекцијата бенрализумаб, исто така, траел подолго, што значи помалку посети на општ лекар или болница за пациентите, велат истражувачите.
Значително подобрување има и во квалитетот на животот, според податоците објавени во списанието „The Lancet Respiratory Medicine“.
Стероидните таблети со децении беа главниот третман за астма и хронични белодробни заболувања, но тие не беа секогаш ефикасни, поради што пациентите мораа да земаат повеќе видови лекови, со ризик повторно да бидат примени во болница.
Редовната употреба на стероиди го зголемува и ризикот од дијабетес и остеопороза, истакнуваат експертите.
„Ова е одлична вест за луѓето со белодробни заболувања. Но поразително е тоа што ова е првиот нов третман во последните 50 години, што покажува колку е недоволно финансирано истражувањето за белодробните заболувања“, рече д-р Саманта Вокер.
