Комплексот „Гемлик“ кај Бурса, во којшто започнува сериското производство на турскиот автомобил ТОГГ (TOGG), кој е еден од поважните визионерски државни мегапроекти ќе биде отворен утре во присуство на претседателот на Република Туркије, Реџеп Таип Ердоган.
Свечената церемонија ќе се одржи на националниот празник Ден на Републиката, кој Туркије го одбележува на 29 октомври. Оваа година Републиката го слави својот 99. роденден.
Со иницијатива на претседателот Ердоган турскиот сон за домашен и национален автомобил оживеа, а потрагата по инвеститори под водство на Унијата на комори и берзи на Туркије (TOBB) e завршена за кратко време.
Домашното производство на автомобилот ќе се врши под координација на Министерството за индустрија и технологија на Турција и ТОББ, а Протоколот за соработка за заедничко вложување во автомобилскиот проект беше потпишан на 2 ноември 2017 година од групацијата „Анадолу“, БМЏ, холдингот „Кирача“, групацијата „Турксел“ и холдингот „Зорлу“.
Потоа се влезе во фаза на основање и технички и финансиски анализи. Групацијата ТОГГ официјално е основана на 25 јуни 2018 година, а покрај петте партнерски компании, ТОББ презеде 5 отсто од сопственоста, за потоа да го зголеми сопственичкиот удел на 8 отсто. За директор на ТОГГ е назначен Мехмет Гурџан Каракаш.
На крајот на 2019 година беше одредена локацијата на којашто ќе се гради фабриката, а со присуство на претседателот Ердоган беа претставени и карактеристиките и прототипите на двата модела на турскиот електричен автомобил Ц-СУВ и Ц-Седан.
Сите потребни дозволи и согласности беа издадени до март 2020 година, а дизајнот на ентериерот и екстериерот на ТОГГ-автомобилот е регистриран од Канцеларијата на Европската Унија за правата на интелектуална сопственост (EUIPO) на 12 април, додека Кинескиот институт за патенти на 24 јуни истата година го регистрира дизајнот на СУВ-от и лимузината на турскиот автомобил.
Изградбата на фабричкиот комплекс за производство на електрични автомобили во областа Гемлик во турската област Бурса официјално започна во јули 2020 година на површина од 1,2 милиони метри квадратни.
ТОГГ го избра „Фарасис“, еден од водечките светски производители на лион батерии, за свој деловен партнер за производство на батерискиот сет во Туркије.
Новото лого на ТОГГ беше претставено на 18 декември 2021 година. Две стрелки во дизајнот на логотипот, кои се спојуваат во скапоцен камен во средината, го симболизираат спојувањето на источните и западните култури и истакнуваат дека ТОГГ е технолошка компанија која ги спојува технологијата и луѓето на крстосницата денес и утре.
Тестирањето на турскиот автомобил ТОГГ беше извршено на лиценцирани писти во Туркије, Шведска и Аргентина, а успехот во таа фаза го отвори патот и за утрешното свечено отворање на комплексот фабрики за сериско производство на електричниот автомобил кој се истакнува по богатите дизајнерски и технолошки карактеристики.
На ТОГГ ќе му треба помалку од половина час за полнење на 80 проценти од батеријата. Автомобилот, кој ќе има опции за досег од „300+“ и „500+“ километри со својата вродена електрична модуларна платформа, ќе биде постојано поврзан со центарот и ќе може да прима ажурирања преку 4Г/5Г врска.
Опремен со долготрајна батерија, која ја обезбедуваат напредните системи за управување со батеријата и системи со активно управување со топлина, автомобилот може да забрза од 0-100 км/час за помалку од 7,6 секунди со 200 коњски сили и 4,8 секунди со 400 коњски сили.
Со батерија интегрирана во платформата, компатибилна со нивото Евро НКАП со пет ѕвезди, ќе има висока отпорност на удар и 30 проценти поголема отпорност на торзија.
По завршувањето на хомологациските тестови, првиот СУВ во сегментот C ќе биде лансиран на пазарот на крајот на првиот квартал од 2023 година. Потоа седан и хечбек моделите во Ц-сегментот ќе влезат во производствена линија. Во наредните години, со додавање на Б-СУВ и Ц-МПВ, ќе биде комплетиран асортиманот на ТОГГ кој се состои од пет модели.
Кога комплексот ќе достигне капацитет на годишно производство од 175.000 возила, ќе вработи 4.300 луѓе. ТОГГ планира до 2030 година да произведе еден милион возила.
