Седумдесет израелски парламентарци, односно членови на Кнесетот го поддржаа мировниот договор за Газа предложен од американскиот претседател Џо Бајден во петокот, потпишувајќи ја кампањата што ја започнаа семејствата на Израелците кои ги држи Хамас.
Семејствата ќе ги продолжат состаноците со членовите на Кнесетот денес, надевајќи се дека ќе добијат потписи од 100 пратеници од 120-члениот Кнесет, објави весникот „Једиот ахронот“.
Семејствата доцна синоќа објавија дека добиле потписи од 70 членови на Кнесетот кои го повикуваат израелскиот премиер Бенјамин Нетанјаху да се согласи на размена на заробеници со Хамас.
Според весникот, некои членови на Кнесетот од партиите на владејачката коалиција, вклучително и партијата Ликуд и екстремно десничарската Религиозна ционистичка партија на министерот за финансии Безалел Смотрич, потпишале договор за поддршка на предлогот на Бајден за прекин на огнот.
Се додава дека партијата „Еврејска моќ“ (Оцма Јехудит) на министерот за национална безбедност Итамар Бен-Гвир, од крајната десница, е единствената во Кнесетот чии членови не го поддржаа прекинот на огнот.
Во петокот, американскиот претседател Џо Бајден рече дека Израел претставил трифазен договор со кој ќе се стави крај на непријателствата во Газа и ќе се обезбеди ослободување на заложниците држени во крајбрежната енклава. Планот вклучува прекин на огнот, размена на заложници и затвореници и обнова на Газа.
Министрите на израелската Влада, вклучително и Бен-Гвир и Смотрич, се заканија дека ќе ја соборат Владата доколку Нетанјаху се согласи со најавувањето на прекинот на огнот од Бајден.
Со индиректните преговори меѓу Израел и Хамас со посредство на САД, Катар и Египет досега не се успеа да се постигне договор за траен прекин на огнот.
Израел ја продолжува својата брутална офанзива врз Појасот Газа по нападот на Хамас на 7 октомври и покрај Резолуцијата на Советот за безбедност на Обединетите нации со која се бара итен прекин на огнот.
Оттогаш, повеќе од 36.500 Палестинци се убиени во Газа, огромно мнозинство жени и деца, а повеќе од 82.600 се повредени, според локалните здравствени власти.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за гарантирање дека хуманитарната помош ќе стигне до цивилите во Газа.
