Седумдесет и седум нобеловци испратија отворено писмо во понеделникот во кое го изразија своето противење на назначувањето на Роберт Кенеди Џуниор за министер за здравство на САД во кабинетот на Доналд Трамп, особено поради неговиот „недостиг на искуство“ и ставовите против вакцините.
„Со оглед на неговите ставови, поставувањето на Кенеди на чело на Министерството за здравство би претставувало ризик за јавното здравје“, напишаа 77-те добитници на Нобеловата нагарада за медицина, физика, хемија и економија во писмо до американските сенатори кои мора да го потврдат назначувањето.
Помеѓу потписниците е и Дру Вајсман, добитник на Нобеловата награда за медицина за 2023 година за неговата работа на развојот на гласничка РНК вакцина, клучна во борбата против Ковид-19.
Роберт Кенеди Јуниор, внук на убиениот претседател Џон Ф. Кенеди, водеше кампања како претседателски кандидат во ноември пред да се откаже и да го поддржи Доналд Трамп.
По победата на претседателските избори, републиканецот го награди за поддршката со тоа што му додели министерско ресор, но ова назначување мора да биде потврдено од Сенатот.
Поранешниот адвокат за заштита на животната средина, без научна основа ширеше теории на заговор за вакцините против Ковид-19, како и за наводна поврзаност помеѓу вакцинацијата и аутизмот, и бараше да се стави крај на додавањето флуор во водата од чешма, иако тоа се смета за голем здравствен успех во борбата против расипувањето на забите.
„Покрај недостатокот на квалификации или релевантно искуство во медицината, науката, јавното здравство или владата, г-дин Кенеди е противник на многу вакцини кои помогнаа да се заштити здравјето и да се спасат животи, како што се оние против сипаници и детска парализа. Силно ве охрабруваме да гласате против потврдата за неговото именување за министер за здравство“, посочуваат потписниците на отвореното писмо.
