Група вработени во администрацијата на Бајден се собраа пред Белата куќа синоќа и за време на бдеењето со свеќи в рацете бараа прекин на огнот во Газа.
Персоналот, составен од политички претставници, вработени во администрацијата и персонал со кариера во државната служба, држеше транспарент на кој пишуваше: „Претседателе Бајден, вашиот персонал бара прекин на огнот“.
Пред нив беа наредени свеќи со кои беа испишани зборовите „ПРЕКИНЕТЕ ГО ОГНОТ“.
Во изјавата во име на групата, поранешниот функционер на Стејт департментот, Џош Пол, рече дека привременото примирје што заврши пред скоро две недели не е доволно.
„Мораме итно да реагираме за да спасиме што е можно повеќе животи и да постигнеме итен, траен договор за прекин на огнот и враќање на сите заложници“, рече тој.
Пол поднесе оставка од функцијата во октомври поради несогласување со раководењето на администрацијата на Бајден во однос на конфликтот во Газа.
Подоцна, групата гласно ги читаше имињата на Палестинците убиени во израелските напади во Газа од 1 декември и положи рози во спомен на жртвите.
Израел го бомбардира Појасот Газа од воздух и од копно, воведе опсада и изврши копнена офанзива како одмазда за прекуграничниот напад на палестинската група Хамас на 7 октомври.
Според здравствените власти на Газа, досега во израелските напади загинале најмалку 18.608 Палестинци, а 50.594 се повредени.
Официјалната бројка на загинати во Израел изнесува 1.200, додека околу 139 заложници и понатаму се во заробеништво, според официјалните податоци.
