Палестинскиот претседател Махмуд Абас предупреди на хуманитарна катастрофа што ќе се случи поради израелските напади и изјави дека депортацијата на луѓето во Газа ќе биде „втора Накба“ (Голема катастрофа).
Израелската војска денеска го повика палестинското население да се премести од северот на Појасот Газа на југот на овој блокиран регион поради најавената воена акција против Хамас.
Според веста на официјалната палестинска новинска агенција ВАФА, Абас во Аман, главниот град на Јордан, се сретнал со американскиот државен секретар Антони Блинкен.
За време на средбата, Абас изјави дека израелските напади врз палестинскиот народ треба да престанат што е можно поскоро.
Тој изјави дека е против преселувањето на луѓето во Газа наведувајќи дека тоа ќе биде „уште една Накба“.
Повикувајќи на отворање на коридори за хуманитарна помош за Газа, испорака на медицинска помош и снабдување со електрична енергија, вода и гориво, Абас рече: „Предупредуваме на хуманитарна катастрофа бидејќи единствената електрана во Газа не може да дава услуги и сите хуманитарни услуги престанаа.
Тој рече дека „мора да престане теророт на колонијалистите врз луѓето во палестинските бегалски кампови, села и градови на Западниот Брег“.
Изјавувајќи дека е против убивањето или казнувањето на цивилите од двете страни, Абас повика на ослободување на цивилите и заложниците.
Палестинскиот претседател истакна дека мирот и безбедноста ќе се постигнат со давање легитимни права на палестинскиот народ и истакна дека треба да се постигне политичко решение.
Накба, или Денот на големата катастрофа, го симболизира страдањето и прогонството на палестинскиот народ од формирањето на израелската држава на палестинска земја.
Милиони Палестинци се уште имаат статус на бегалци и сонуваат за денот кога ќе се вратат во својата татковина.
Палестинско-израелскиот конфликт датира од 1917 година, кога Владата на Велика Британија, во Декларацијата Балфур повика на формирање национален дом за еврејскиот народ во Палестина.
Според Палестинското биро за статистика (ПЦБС), Накба резултираше со раселување на речиси 800.000 Палестинци, од 1,4 милиони кои живееле во историската Палестина, во 1948 година во 1.300 села и градови.
