Службеник на ЦИА, кој работи во странство, обвинет е за откривање доверливи документи во кои наводно има детали за подготовките на Израел за одмазднички напад врз Иран.
„Вашингтон пост“, повикувајќи се на судски записи и извори запознаени со случајот, објави дека Асиф В. Рахман бил уапсен во вторникот во Камбоџа и однесен на прекуморската американска територија Гвам.
Денес тој е обвинет од федералниот суд во Северна Вирџинија, во близина на седиштето на ЦИА во Ленгли, близу Вашингтон.
Рахман се соочува со две обвиненија според Законот за шпионажа за намерно пренесување доверливи информации. Американски документи од висока тајност биле незаконски откриени на 17 октомври од Камбоџа, вели „Вашингтон пост“.
На 22 октомври ФБИ соопшти дека го истражува протекувањето на наводно доверливи документи со деталните подготовките на Израел за одмаздничкиот напад врз Иран.
Документите, со датум од 15 и 16 октомври, почнаа да циркулираат на 20 октомври откако беа споделени на каналот на Телеграм, Middle East Spectator. Протекувањето, наводно, доаѓа од извор во американската разузнавачка заедница.
На 1 октомври Иран изврши балистички напад како одмазда за атентатите на поранешниот политички лидер на Хамас во Техеран во јули и убиството на генералниот секретар на Хезболах, Хасан Насрала, во Бејрут овој септември.
Во ракетен бараж беа истрелани речиси 200 проектили, кои погодија неколку локации во Израел, вклучително и воен објект, но немаше жртви.
