Министерот за одбрана на Република Туркије Хулуси Акар ги коментираше тврдењата дека турските Вооружени сили ја „погодиле американската набљудувачка позиција“ во северна Сирија.
„Не доаѓа в предвид да им наштетиме на коалициските сили или цивили“, рече Акар пред новинарите.
Тој се осврна и на најновите случувања во рамките на операцијата „Канџа-меч“.
„Направивме се и ќе продолжиме да правиме се што е потребно да го запреме тероризмот, за безбедноста на нашата земја, нацијата и нашите граници.“
Тој додаде дека успешно продолжува воздушната операција „Канџа-меч“.
„Операцијата продолжува од воздух и од земја, а досега се неутрализирани вкупно 326 терористи на ПКК“, рече Акар.
Во утринските часови во недела турските сили покренаа прекугранична воздушна операција „Канџа меч“ против терористичката организација ПКК/ЈПГ која делува во терористичките засолништа во пограничните делови на Сирија и Ирак и планира напади врз Туркије.
Турските функционери истакнаа дека операцијата е покрената во согласност со меѓународното право и правото на нацијата на самоодбрана според резолуциите на Обединетите нации. Исто така нагласуваат дека терористите се единствената цел на операцијата.
Воздушната антитерористичка операција „Канџа меч“ следуваше по терористичкиот напад кој терористите на ПКК/ЈПГ го изведоа на 13 ноември во истанбулската улица Истиклал во кој се убиени шест лица, а 81 лице е повредено.
ПКК е сепаратистичка организација која се наоѓа на листата на терористички групи во Туркије, ЕУ и САД. Во текот на повеќедецениската терористичка кампања против Туркије, терористите на ПКК убија најмалку 40.000 луѓе. ЈПГ е сириски огранок на ПКК.
