Специјалната известувачка на Обединетите нации за Палестина, Франческа Албанезе, остро го критикуваше тврдењето на израелскиот премиер Бенјамин Нетанјаху дека израелските воздушни напади врз Јужен Либан биле насочени исклучително кон Хезболах, нарекувајќи го тврдењето лажно.
„Како и Палестинците, Либанците знаат дека лажете“, рече Албанезе во објавата на социјалните мрежи, обвинувајќи го израелското раководство дека е „бескрупулозно“ и дека користи насилство за да ја одржи власта и да продолжи со „доселеничко-колонијалната агенда“.
Таа нагласи дека е можно израелското општество да е „премногу повредено, трауматизирано или индоктринирано“ за да види алтернативи за бескрајното војување.
Албанезе, исто така, праша зошто Нетанјаху сè уште не се соочил со правдата за воените злосторства, изјавувајќи дека и Палестинците и Либанците можеби се прашуваат „зошто сè уште не сте во Хаг“, мислејќи на холандскиот град во кој се наоѓаат Меѓународниот кривичен суд и Меѓународниот суд на правдата.
Израел започна серија воздушни напади врз Јужен и Источен Либан, а либанските здравствени власти соопштија дека најмалку 492 лица загинале, меѓу кои 35 деца, а 1.645 се повредени во нападите од вчераутро, кои принудија и илјадници цивили да ги напуштат своите домови.
Хезболах и Израел разменуваат прекуграничен оган од почетокот на израелската војна во Газа, во која досега загинаа над 41.400 луѓе, од кои мнозинството се жени и деца, по прекуграничниот напад на палестинската група Хамас на 7 октомври минатата година.
