Шефот на Дирекцијата за комуникации на Претседателството на Република Туркије, Фахретин Алтун, ја истакна важноста од зајакнување на врските со Грција преку меѓусебно разбирање, економска соработка и културна размена.
„Просперитетот на идните генерации зависи од зајакнувањето на билатералните односи“, рече Алтун во интервјуто за грчкиот весник „Та неа“ во неделата, мислејќи на клучните регионални прашања и нерешените спорови.
„Промовирањето на меѓусебното разбирање, проширувањето на трговските можности, продлабочувањето на врските меѓу луѓето и стремежот за заеднички просперитет ќе имаат корист за сите. Со приоритизирање на овие цели, можеме да обезбедиме дека оние кои се обидуваат да го попречат напредокот и да го блокираат патот кон соработка и мир ќе бидат настрана“, додаде тој.
Зборувајќи за зајакнувањето на културната соработка, Алтун ја истакна поддршката на Анкара за враќање на мермерот од Партенон на Грција и повика на меѓусебно почитување во однос на чувствителните прашања како што се Егејското Море и турското малцинство во Грција.
„Би било корисно за грчката јавност да разбере дека Егејското Море не е грчко езеро и дека Туркије, со своето долго крајбрежје, го дели ова море и има легитимни права и витални интереси во тој регион“, рече тој, нагласувајќи ја потребата за мирно решавање на спорови според меѓународното право.
Зборувајќи за турското малцинство во Грција, Алтун додаде: „Турското малцинство бара официјално признавање на нивните избрани верски водачи и слобода да го изразат својот етнички идентитет без страв од правни или административни последици, слични на слободите што ги ужива грчкото малцинство во Туркије.“
Повик на реализам Говорејќи за островот Кипар, Алтун го критикуваше повеќедеценискиот неуспех на преговори под покровителството на ОН за „федерација со две зони и две заедници“.
„Време е да се препознае реалноста на теренот: постоењето на два посебни народи и две посебни држави на островот Кипар. „Ниту кипарските Турци, ниту Туркије не се подготвени да изгубат уште 60 години“, рече тој.
Осврнувајќи се на 6-та седница на Советот за соработка на високо ниво, што ќе се одржи следната година во Анкара, Алтун изрази оптимизам во однос на натамошниот развој на билатералните односи, нагласувајќи дека овие средби опфаќаат широк опсег на теми и вклучуваат ангажман на високо ниво на двете земји. „Кога се во прашање соседи како Туркије и Грција, ова би требало да биде природна норма,а не исклучителен настан“, заклучи тој.
Неограничена соработка со Грција
Алтун, исто така, го пофали успехот на заедничките кандидатури на Туркије и Грција за улоги во Организацијата за безбедност и соработка во Европа, истакнувајќи го како доказ за нивниот потенцијал за соработка на меѓународните платформи.
„Иако имаме нерешени разлики за одредени прашања, предизвиците со кои се соочуваат двете земји, како и нашите интереси во регионот и пошироко, во голема мера се преклопуваат“, истакна тој. „Соработката ни овозможува да го префрлиме нашиот фокус од конфликт на заеднички цели.“
Алтун заклучи со оптимистичка визија за билатералните односи: „Кога станува збор за продлабочување на односите со Грција, за нас нема граници“.
