Директорот за комуникации на Туркије Фахретин Алтун рече дека земјата ќе излезе од оваа огромна катастрофа со духот на солидарноста по земјотресите што го погодија јужниот регион на земјата на 6 февруари.
Изјавувајќи дека Туркије се бори против дезинформациите, манипулациите и управувањето со перцепциите среде катастрофата и кризниот период, Алтун рече дека земјата „се соочува со една од најголемите катастрофи во светот и во географијата на која и припаѓа“.
Во писмото испратено до Конференцијата на министри за информации при Организацијата за исламска соработка (ОИС), Алтун рече дека напорите за пребарување и спасување започнале речиси девет часа по силните земјотреси.
„Персонал од вкупно 113.318 лица и волонтери од различни институции и невладини организации, од кои 24.727 се персонал за пребарување и спасување, вклучени се во напорите за одговор при катастрофи“, рече тој.
Повикувајќи ги министрите за информации од земјите-членки на ОИС да ги поддржат напорите на Туркије во борбата против дезинформациите и информирањето на јавноста, Алтун рече: „Веруваме дека вашата поддршка ќе биде важен знак за солидарноста и единството што исламскиот свет ги покажа во тешки времиња."
„Ќе ја надминеме оваа голема катастрофа во духот на солидарноста“, додаде тој.
Алтун понатаму истакна дека најмалку 94 земји и понудиле поддршка на Турција и им се заблагодари на сите пријателски земји за нивната поддршка и помош во овој, како што рече, тежок период.
Два разорни земјотреси со јачина од 7,7 и 7,6 степени според Рихтер на 6 февруари ги погодија јужните делови на Туркије со епицентар во провинцијата Кахриманмараш, а борјни спасувачки екипи и понатаму посветено работат на акциите на пребарување и спасување на луѓето заглавени под урнатините на зградите.
Земјотресите исто така погодија неколку земји во соседството и предизвикаа големи разурнувања на северот на Сирија.
Во земјотресите на југот на Туркије загинаа 31.974 лица, а според последните официјални податоци, во земјотресите во Сирија загинаа 3.600 лица.
