Активен припадник на американското воено воздухопловство синоќа се самозапалил пред израелската амбасада во Вашингтон во знак на протест против војната во Газа, јавуваат бројни американски медиуми.
„Веќе нема да бидам соучесник во геноцидот. Ќе се впуштам во екстремен чин на протест, но во споредба со она што луѓето го доживуваат во Палестина од рацете на колонизаторите, ова воопшто не е екстремно. Ова е она што нашата владејачка елита одлучи дека ќе биде нормално“, рече 25-годишниот Арон Бушнел пред да се самозапали.
Видеото кое го прикажува неговиот протестен изглед и моментот кога Бушнел се запали стана вирално.
Пожарот бил изгаснат од персоналот на Тајната служба, а Бушнел подоцна бил пренесен во болница со „критични повреди опасни по живот“, според Одделот за пожарна и итна медицинска помош во Вашингтон.
Во извештајот се вели дека возрасен маж се самозапалил пред израелската амбасада во Вашингтон.
„По пристигнувањето на местото на настанот видовме дека пожарот го изгаснале униформирани припадници на Тајната служба“, изјавил неименуваниот функционер.
Повеќе извештаи велат дека мажот извикал „Слободна Палестина“ пред да се самозапали.
„Вашингтон пост“ објави дека портпаролката на воздухопловните сили Роуз М. Рајли потврдила дека станува збор за активен воздухопловец.
Во видеото емитувано во живо на платформата Твич, кое подоцна беше отстрането, Бушнел рече дека „повеќе нема да биде соучесник во геноцидот“, во врска со израелските убиства во Газа.
Локалните власти најавија дека истрагата за случајот е во тек.
Во декември 2023 година, едно лице се самозапали пред израелскиот конзулат во Атланта, САД во знак на протест против израелските напади во Појасот Газа.
