Американскиот претседател Џо Бајден денес ќе го свика својот тим за национална безбедност за да разговара за случувањата на Блискиот Исток, соопшти Белата куќа.
Состанокот е затворен за медиумите.
Исто така, Бајден ќе разговара со јорданскиот крал Абдула Втори, додаде Белата куќа.
Околу 39.600 Палестинци се убиени за речиси 10 месеци откако Израел на 7 октомври започна со бруталните напади врз Појасот Газа, по нападот на палестинската група на отпорот Хамас.
Нападот предизвика зголемени регионални тензии, а последната ескалација се случи минатата среда кога политичкиот шеф на Хамас, Исмаил Ханије, беше убиен во иранскиот главен град Техеран, еден ден откако во израелски напад врз предградие на Бејрут беше убиен висок воен командант на либанската група Хезболах.
Врховниот лидер на Иран, ајатолахот Али Хамнеи, наводно, наредил напад врз Израел како одмазда за убиството на Ханије.
Пентагон во петокот објави дека САД ќе распоредат дополнителни воени елементи на Блискиот Исток поради зголемените тензии во регионот.
„Министерството за одбрана продолжува да презема чекори за да се избегне можноста за регионална ескалација од страна на Иран или иранските партнери и посредници“, се вели во соопштението.
