Американскиот претседател Џозеф Бајден изјави дека го помилувал својот син Хантер Бајден во судската постапка против него за даночни злоупотреби и во врска со носење огнено оружје, а својата одлука ја оправда со тврдењето дека неговиот син бил подложен на неправедно гонење.
Бајден рече дека во неделата потпишал помилување за неговиот син Хантер, иако, откако ја презеде функцијата претседател, изјави дека нема да се меша во одлуките што ги носат судовите и Министерството за правда.
Тој изјави дека до сега останал на таа одлука, и покрај тоа тоа што, како што навел, гледал како неговиот син е „неправедно гонет“.
Во помилувањето се наведува дека Бајден одобрил „целосно и безусловно“ помилување за Хантер Бајден за какви било прекршоци помеѓу 1 јануари 2014 година и 1 декември оваа година.
Бајден оцени дека Хантер бил кривично гонет само затоа што е негов син.
Хантер Бајден се изјасни за виновен за даночни прекршувања и беше осуден за обвинение за огнено оружје, откако даде лажна изјава дека не користи дрога при добивањето на дозволата за оружје.
Во септември тој се изјасни за виновен за даночно затајување од 1,4 милиони долари, а пресудата во тој случај беше закажана за 16 декември.
Белата куќа постојано објавуваше дека Бајден нема да го помилува или ублажува казните за неговиот син Хантер.
Републиканците ја критикуваа одлуката на Бајден да го помилува својот син.
Новоизбраниот американски претседател Доналд Трамп изјави дека со помилувањето на Хантер, Бајден ја злоупотребил својата положба и овластувања и со тоа спречил правдата да биде задоволена.
На својата социјална мрежа Truth Social, Трамп праша зошто осудените за нападот на Капитол на 6 јануари 2021 година не биле помилувани бидејќи не ги признале резултатите од претседателските избори, според кои победил Бајден.
