Американскиот претседател Џо Бајден и израелскиот премиер Бенјамин Нетанјаху во неделата телефонски разговарале за планираната израелска офанзива во Рафах, во јужниот дел на Појасот Газа, соопшти Белата куќа.
„Претседателот ја истакна потребата акцијата на Израел да се продолжи и да се зајакне во целосна координација со хуманитарните организации. Лидерите разговараа за Рафах, а претседателот ја повтори својата јасна позиција“, се вели во соопштението на Белата куќа.
И покрај меѓународните предупредувања за планираната израелска инвазија на Рафах, израелската армија инсистира да продолжи со напад на малиот град, во кој живеат повеќе од 1,4 милиони раселени Палестинци.
САД нагласуваат дека поразот на Хамас е важен, но секоја операција во Рафах треба да ја земе предвид цивилната безбедност и испораката на хуманитарна помош.
„Претседателот и премиерот разговараа и за зголемување на испораката на хуманитарна помош во Газа, вклучително и преку подготовките за отворање нови северни премини почнувајќи од оваа недела“, додаде Белата куќа.
Бајден, исто така, ја потврди „железната посветеност“ на САД за безбедноста на Израел по одбраната од иранскиот ракетен и беспилотен напад претходно овој месец.
Тие, исто така, ги разгледаа тековните разговори за да се обезбеди ослободување на заложниците заедно со итен прекин на огнот во Газа, додаде Белата куќа.
Израел започна брутална офанзива на Појасот Газа од 7.октомври по нападот на Хамас, во кој загинаа речиси 1.200 луѓе.
Повеќе од 34.400 Палестинци оттогаш се убиени, а илјадници се повредени во услови на масовно уништување и сериозен недостиг на неопходни работи.
Повеќе од шест месеци по израелската војна, огромни делови од Газа се во урнатини, туркајќи 85 отсто од населението на енклавата во внатрешно раселување во услови на осакатувачка блокада на храна, чиста вода и лекови, според ОН.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да се погрижи неговите сили да не вршат акти на геноцид и да гарантираат дека ќе се обезбеди хуманитарна помош за цивилите во Газа.
