Американскиот претседател Џо Бајден синоќа ги повика Американците да „застанат заедно“ по обидот за атентат врз поранешниот претседател Доналд Трамп, велејќи дека политиката никогаш не смее да биде „бојно поле“.
„Ние дебатираме и не се согласуваме, ги споредуваме и го спротивставуваме карактерот на кандидатите, записите, прашањата, агендата, визиите за Америка. Но, во Америка, нашите несогласувања ги решаваме со гласачките кутии. Така го правиме тоа, со гласачката кутија - не со куршуми. Моќта да се смени Америка секогаш треба да биде во рацете на народот, а не во рацете на потенцијален убиец“, рече Бајден, обраќајќи ѝ се на нацијата од Овалната соба.
Тој наведе дека несогласувањата се неизбежни во демократијата.
„Но политиката никогаш не смее да биде буквално бојно поле, не дај Боже поле на убивање. Не може да дозволиме ова насилство да биде нормално. Политичката реторика во оваа земја стана многу вжештена. Време е да се олади. Сите имаме одговорност да го направиме тоа“, рече Бајден.
Тој изрази уверување дека политиката треба да биде арена за мирна дебата.
„Насилството никогаш не било решение“, нагласи Бајден.
По повод обидот за атентат врз Трамп на митингот, Бајден рече дека мотивот на напаѓачот, кој е идентификуван како Томас Метју Крукс, 20-годишен маж од Пенсилванија, сè уште не е познат.
Дваесетгодишниот Томас Метју Крукс од Пенсилванија се обиде да изврши атентат врз поранешниот американски претседател и кандидат на претстојните претседателски избори, Доналд Трамп.
Како што претходно соопшти Федералното истражно биро (ФБИ), напаѓачот пукаше во републиканскиот претседателски кандидат Трамп додека тој држеше говор на бина во Пенсилванија.
Трамп е полесно ранет во пределот на десното уво, а со интервенција на обезбедувањето беше отстранет од бината.
Напаѓачот е неутрализиран, неговото тело е пронајдено недалеку од местото на нападот, во кој се ранети уште две лица.
