Мрежата за шверц на дрога на терористичката организација ПКК, која повеќе од три децении „цвета“ во Европа, не е тајна за безбедносните и разузнавачките служби.
Терористичката група „жнее“ над 1,5 милијарди годишно од нејзината контрола над околу 80 отсто од европскиот пазар на нелегална дрога, според бројките кои ги презентираше турскиот министер за внатрешни работи Сулејман Сојлу. Овие средства ги користи за да ја води својата повеќе од 35-годишна терористичка кампања против Туркије, предизвикувајќи над 40.000 смртни случаи, вклучувајќи невини жени, деца и доенчиња.
Според извештајот на Европол за состојби и трендови во тероризмот во ЕУ за 2022 година, активностите на ПКК во европските земји вклучуваат перење пари, изнуда и трговија со дрога, а тие се координирани од таканаречениот Конгрес на Европското демократско курдско општество (КЦДК-E) лоциран во Белгија.
Заканите, тепањата и бруталните убиства се вообичаена практика за ПКК во Велика Британија, која како и САД, ЕУ и Туркије ја наведува како терористичка група.
Според поранешениот член на озлогласената група „Момци од Тотенхем“, ПКК користејќи ги бандите во својата профитабилна трговија со дрога низ Велика Британија, е особено активна во главниот град Лондон, во северниот дел на градот.
Бандата од околу 400 припадници го држи монополот на дистрибуција на дрога од класа А и Б во северен Лондон, изјави поранешниот член, кој би сакал да остане анонимен поради безбедносни причини.
Човекот, кој во оваа статија го користи алијасот „Али“, рече дека Тотенхем Бојс „е една од најголемите банди“ во Лондон.
„Другите големи се „Бомбардери“ (Хокни Бомберс) и бандата на Хајри Гозтас, познат и како Аданали Хајри“.
„Бандите на Тотенхем Бојс, Бомберс и Хајри Гозтас го контролираат најголемиот дел од трговијата со дрога во британската престолнина заедно со некои помали албански, јамајкански и ирски групи“, изјави Али.
Извештајот на разузнавачката служба на британската градска полиција истакна како Тотенхем Бојс, курдска банда со седиште во Лондон, ги таргетирала локалните курдски бизниси, користела екстремно насилство и била вклучена во рекетирање за да собере пари за терористичката група.
„Сите тие се поврзани со организацијата, која ги води своите операции од Харингеј, од Курдскиот центар на заедницата“, додаде Али.
„И сите тие даваат пари на ПКК на идеолошка основа и затоа што се чувствуваат должни да го сторат тоа“, дополни тој.
„Сите тие и плаќаат на организацијата (ПКК). Мора. Во спротивно, ќе бидат на погрешната страна. Тоа е еден вид дозвола за работа во Лондон и таксата и се плаќа на организацијата“.
„Центарот на организацијата во Лондон е во Харингеј. Курдскиот центар на заедницата. Таму нема да најдете дрога, но тамошните водачи ги знаат сите водачи на бандите“, рече тој, додавајќи дека понекогаш членовите на бандите бараат од водачите на центрите на заедницата да решаваат спорови меѓу нив.
Истакнувајќи дека бандите биле во бескрајна расправија една со друга, Али рече дека „сите имаат членови убиени од ривалските банди“.
„Тие нема покажуваат милост кон никого кој ќе им застане на патот“, додаде тој.
Понатаму, неодамнешното убиство на диџеј Корај, кој беше сопственик на турска радио станица со седиште во Лондон, може да биде поврзано со бандата, „според она што го слушнав на улица“, рече Али.
Тој мисли на убиството на Корај Алпергин, кој беше пронајден мртов во Лутон, Есекс, откако наводно бил киднапиран во Енфилд со неговата девојка. Истрагата за убиството на 43-годишниот маж продолжува, соопшти полицијата.
Друг извор кој некогаш бил близок до бандата управувана од Хајри Гозтас изјави дека и покрај долгата затворска казна и избегнувањето депортација во Туркије, Гозтас исто така се вратил на улиците на Лондон.
„Хајри прибегнува кон закани и насилство за да ги принуди луѓето на постапки кои би биле профитабилни за неговата банда“, рече тој.
Гозтас беше осуден во октомври 2004 година за извоз на хероин во Велика Британија. Тој беше осуден на 16 години затвор, по што веднаш по ослободувањето беше депортиран во Туркије, но остана во земјата бидејќи, наводно, кажал десетици имиња со кои соработувал во тоа време.
„Тој се врати во Харингеј и Далстон. Неговата организација е силна и тие сè уште се во бизнисот со дрога“, рече изворот кој не е именуван поради безбедносни причини, додавајќи дека бандата им се заканувала на некои сопственици на бизниси дека ќе го преземат Далстон.
Познато е дека бандите поврзани со ПКК, исто така, шверцуваат големи количини на кокаин, заедно со хероин и ја дистрибуираат дрогата низ целата земја.
„Како и трговијата со канабис, ПКК има големи криминални интереси во хероинот со широки врски во шверцот од Авганистан во Велика Британија во речиси секоја фаза“, се вели во извештајот на Европскиот парламент од 2012 година.
ПКК и нејзините филијали имаат „силни врски со Германија и Велика Британија“, се вели во истиот извештај.
Организираните злосторства поврзани со ПКК задржуваат „строга контрола над околу 30 тони (хероин) годишно што се внесуваат во Велика Британија“, се вели во извештајот.
