Претседателот Трамп сака траен мир на Блискиот Исток, тој ја донесе оваа одлука за евакуација на Палестинците од Газа со „хумано срце“ за сите луѓе во регионот, изјави доцна синоќа портпаролката на Белата куќа Каролина Левит.
Левит одговараше на прашања на новинарите во Белата куќа во врска со изјавите на Трамп дека Палестинците треба да ја напуштат Газа и неговата последна најава дека „Соединетите Американски Држави ќе го преземат Појасот Газа“ за време на средбата со израелскиот премиер Бенјамин Нетанјаху.
На прашањето дали може да ја објасни промената на ставот на Трамп во врска со најавите за Газа и во контекст на фактот дека тој „ја помина својата политичка кариера критикувајќи мешање во политиката на други држави, испраќајќи американски војници во борба во странство, особено на Блискиот Исток“, Ливит одговори дека оваа ситуација не ги принудува САД да се вклучат во конфликти во странство.
„Претседателот не се обврза да испрати американски војници во Газа. Тој исто така рече дека САД нема да платат за обновата на Газа. Неговата администрација ќе работи со нашите партнери во регионот за реконструкција на оваа област“, рече таа.
Таа нагласи дека неговата цел е „траен мир на Блискиот Исток за сите луѓе во регионот“, и дека САД треба да бидат вклучени во овој процес на обнова за да се обезбеди стабилност во регионот за сите луѓе.
„Но тоа не значи испраќање војници во Газа. Тоа не значи дека американските даночни обврзници ќе ги финансираат овие напори. Тоа значи дека Доналд Трамп, кој е најдобриот преговарач на планетата, ќе склучи договор со нашите партнери во регионот“, рече Ливит.
На дигресијата на новинарот дека Трамп не ја отфрлил можноста за испраќање американски војници во Газа и на прашањето дали таа го прави тоа сега, Левит одговори: „Велам дека претседателот сè уште не одлучил за тоа. Тој не ја презел таа обврска, а вие го знаете тоа“.
Со оглед на тоа што Јордан, Египет и Саудиска Арабија веќе го отфрлија овој план, се постави прашањето кои партнери пројавиле интерес за учество, а Ливит рече дека Трамп веќе некое време ја промовира оваа идеја и дека тоа „не е одлука или најава што тој ја носи лесно“.
„Претседателот веќе разговараше со египетскиот претседат Абдулфатах ал-Сиси. Всушност, тоа беше негов прв разговор со странски лидер. Следната недела тој се состана со кралот на Јордан, кралот Абдула“.
Таа рече дека Трамп многу јасно кажал дека очекува партнерите во регионот, особено Египет и Јордан, „привремено да ги прифатат палестинските бегалци за да можат да ги обноват своите домови“.
Левит за време на брифингот покажа фотографии од уништената Газа, велејќи: „Ова е место кое е непогодно за живеење за луѓето. Дали навистина мислите дека семејствата можат да го живеат својот сон во регион кој изгледа вака, без вода, без струја? Претседателот ја донесе оваа одлука со хумано срце за сите луѓе во регионот“.
