Болницата Ал Ахли во градот Газа го надмина својот капацитет поради големиот број ранети префрлени во оваа институција, рече синоќа портпаролот на Министерството за здравство на Палестина, Ашраф ал Кудра.
Тој апелираше на меѓународна поддршка и заштита од засиленото израелско бомбардирање.
„Пациентите искрвавуваат до смрт“, објави Ашраф ал Кудра на социјалната мрежа Х.
Ал Кудра додаде дека вложуваат напори за да функционираат во што поголем капацитет на медицинскиот комплекс за прием на ранети.
Според неговите зборови, медицинскиот персонал се соочува со значителни предизвици и потребна им е поддршка и заштита од меѓународните организации.
Тој додаде дека и другите болници на северот од блокираниот Појас Газа не работат и дека се соочуваат со потешкотии во работата и на дел од болницата Ал Шифа.
Ал Кудра истакна дека болницата Насер во Хан Јунис е полна со речиси 1.000 повредени и дека тие лежат на подот.
Израел ја продолжи својата воена офанзива во Појасот Газа на 1 декември по завршувањето на еднонеделната хуманитарна пауза во конфликтот со палестинската група Хамас.
Најмалку 16.248 Палестинци загинаа, а над 43.616 се ранети во немилосрдните воздушни и копнени напади врз енклавата од 7 октомври по прекуграничниот напад на Хамас.
