Шефот за надворешна политика на ЕУ ја критикуваше претседателката на Европската комисија Урсула фон дер Лајен за нејзиниот „про-израелски став“.
Во интервју за шпанскиот дневен весник Ел Паис во неделата, Жосеп Борел имаше остри зборови за патувањето на Фон дер Лајен во Тел Авив во октомври 2023 година, каде што понуди безусловна поддршка на ЕУ за војната против Хамас.
„Тоа патување на Фон дер Лајен, со таков апсолутно про-израелски став, без да претставува никого освен себе во прашање на меѓународната политика, имаше висока геополитичка цена за Европа“, рече тој.
Борел исто така рече дека американскиот претседател Џо Бајден заради поддршката на Израел, се чини, ги губи гласовите меѓу младата демократска база.
„Хамас е идеја, а со идеја може да се борите само со друга идеја. Плановите на израелскиот премиер Бенјамин Нетанјаху за Газа се неприфатливи. Тие го сеат семето на омраза за генерациите што доаѓаат“, изјави тој за шпанскиот дневен весник.
„Јавна тајна е дека Израелците го финансираа Хамас како коцкарски потег за поделба на Палестинците“, додаде тој.
Шефот за надворешна политика на ЕУ ја критикуваше израелската влада затоа што одбива да слушне каква било критика, дури и кога таа доаѓа од ОН.
„Го барам моето право да ги критикувам одлуките на израелската влада без да ме сметаат за антисемит. Двете работи немаат никаква врска една со друга“, рече тој.
Борел, исто така, тврди дека меѓународната заедница треба да наметне решение со две држави доколку Израел не сака.
Тој дополнително ги критикуваше САД за нивното вето на нацрт-резолуцијата на Советот за безбедност на ОН која повикува на прекин на огнот во Газа.
„Иако можеби тоа не е нивна намера, тие така го охрабруваат Нетанјаху“, рече тој.
Тој додаде дека иако Израел има право да се брани, неговата употреба на сила е „несразмерна“.
„Веќе сме сведоци на катастрофа: ОН мораше да ја прекине својата помош, а Израел го користи гладот како оружје за војна, што е спротивно на меѓународното право“, рече Борел.
Високиот претставник на ЕУ ја критикуваше и досегашната политичка позиција на ЕУ и поради руско-украинската војна и поради израелските напади врз Газа и рече дека „на Западот се приближува ураган поради неговата политика“. Осврнувајќи се на книгата „Божествена комедија“ на италијанскиот писател и поет Данте Алигиери,Борел истакна дека насилството во Украина и Газа е слично на „кругот на насилство“ споменат во оваа книга. „Путин и Трамп сè уште не победија, но би можеле. Европа мора да се разбуди пред да биде предоцна“, рече Борел.
