Шефот за надворешна политика на Европската Унија, Жосеп Борел, денес рече дека „Туркије е земја кандидат чија геополитичка важност многу повеќе се зголеми во моменталните околности“.
Борел ги даде овие изјави на прес-конференцијата на која го објави Пакетот за проширување за 2024 година, кој вклучува оценки за земјите кандидати како Туркије, Северна Македонија, Србија, Албанија, Црна Гора, Босна и Херцеговина, Косово, Украина и Молдавија.
На прес-конференцијата му се придружи и европскиот комесар за соседство и проширување Оливер Вархеји.
Истакнувајќи дека работел „многу за да ја смени негативната спирала во односите Туркије-ЕУ“, Борел рече: „На почетокот работите беа многу потешки од денес. Повторно сме вклучени во областите од заеднички интерес“.
Нагласувајќи ја важноста на Туркије за Унијата, Борел рече: „Туркије, таа е од суштинско значење. Од суштинско значење е бидејќи геополитичкиот контекст е најпредизвикувачкиот, најпредизвикувачкиот каков што не бил веќе долго време“.
„И европските граѓани очекуваат Европската Унија да има капацитет да дејствува за да обезбеди стабилност и соработка во нашето соседство, во областите што нѐ опкружуваат“, додаде тој.
Борел говореше и за напредокот во областите како трговијата, спречувањето на перење пари, истражувањето и иновациите, како и економските и монетарните политики, велејќи дека напорите на Туркије на овие полиња се ценети.
Во „Извештајот за Туркије“ во рамките на Пакетот за проширување за 2024 година се наведува дека развивањето на кооперативни, заемно корисни односи, е од стратешки интерес на ЕУ, истакнувајќи ја улогата на земјата како активен и важен актер во надворешната политика со стратешка автономија.
