Турскиот министер за надворешни работи Мевлут Чавушоглу укажа на важноста на земјите како Туркије, Јапонија, Бразил и Индија во мултиполарниот свет и рече дека актуелниот меѓународен систем не успева да одговори на тековните проблеми.
„Заживувањето на Азија ја смени глобалната рамнотежа. Пандемиите, климатските проблеми, миграциите, тероризмот и енергетските и прехранбените кризи се глобалните проблеми на човештвото. За жал, сегашниот меѓународен систем не успева да одговори на нив“, рече Чавушоглу на прес-конференцијата во Токио, главниот град на Јапонија.
Тој нагласи дека сегашниот систем го трасира патот на конкуренцијата, а не на солидарноста и додаде дека таквата конкуренција е евидентна во текот на пандемијата од Ковид-19, како и во однос на прашањето на миграциите.
„Во такви епохи, глобалните актери мораат да застапуваат здрав разум, дијалог и дипломатија. Туркије активно води таква надворешна политика“, рече Чавушоглу.
Шефот на турската дипломатија рече и дека неговата држава за прашањата кои се однесуваат на Украина, Босна и Херцеговина, Кавказ, Либија и Сирија води активна политика која дава резултати во корист на целиот свет.
„И меката и тврдата моќ мораат да се користат во соочувањето со кризите“, порача Чавушоглу, изјавувајќи дека способноста да се разговара и со истокот и со западот е важна предност на Туркије.
Тој додаде дека Туркије, како членка на НАТО и кандидат за членство во ЕУ, била една од ретките актери кои успеале да имаат активни односи и со Русија и со Украина.
Во врска со односите на Туркије и Јапонија, Чавушоглу ги поздрави долгогодишните билатерални односи, потврдувајќи ја спремноста на неговата земја, дополнително да го зајакне стратешкото партнерство на Анкара и Токио.
„Гледаме голем потенцијал во областите како што се одбранбената индустрија, енергетиката, науката и технологијата“, додаде турскиот министер за надворешни работи.
Чавушоглу пристигна во Токио доцна синоќа за да присуствува на државниот погреб на јапонскиот премиер Шинзо Абе, кој е убиен кон почетокот на јули на предизборен собир во западниот јапонски град Нара.
Безбедносните агенции во Јапонија се ставени во состојба на приправност и повеќе од 18.000 полицајци ја чуваат локацијата во Токио, каде повеќе од 30 странски функционери ќе оддадат почит на поранешниот лидер на владејачката Либерално-демократска партија.
Меѓу странските гости се и потпретседателката на Соединетите Американски Држави Камала Харис, премиерите на Австралија, Индија, Јужна Кореја и Камбоџа и претседателот на Меѓународниот олимписки комитет Томас Бач.
Значаен дел од јавноста во Јапонија ги критикува организаторите на државниот погреб бидејќи за тоа од буџетот се потрошени околу 11,6 милиони долари.