Поранешниот грчки премиер Алексис Ципрас денес изјави дека Израел треба да биде санкциониран доколку не прифати итен прекин на огнот во Газа.
Говорејќи на состанокот на Политичкиот комитет на Парламентарното собрание на Советот на Европа во норвешката престолнина Осло, Ципрас го повика Советот на Европа да изврши притисок за санкции кон Израел доколку тој не прифати паралелно прекин на огнот во Газа за итно ослободување на заложниците од страна на Хамас, објави весникот ЕФСУН.
„Зборовите не се доволни бидејќи двојните стандарди на Европа секојдневно го поткопуваат концептот на европските вредности“, додаде тој.
Израел ја продолжи својата брутална офанзива врз Газа по нападот на Хамас на 7 октомври и покрај резолуцијата на Советот за безбедност на ОН со која се бара итен прекин на огнот.
Според локалните здравствени власти, оттогаш во Газа се убиени повеќе од 36.200 Палестинци, главно жени и деца, а речиси 81.800 се повредени.
Речиси осум месеци по почетокот на израелската војна големи делови од Појасот Газа се во урнатини, а има и блокада на храна, чиста вода и лекови.
Израел е обвинет за геноцид пред Меѓународниот суд на правдата (МСП), кој во својата последна пресуда му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од еден милион раселени Палестинци побараа засолниште.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
