Десетици товарни бродови почнаа со подготовки за поаѓање од три пристаништа на Црното Море, во согласност со договорот потпишан минатата недела со посредство на Туркије.
Киев соопшти дека се обновени активностите на три пристаништа на Црното Море одредени според неодамнешниот договор со Русија за обновување на извозот на житарки што беа блокирани со воената интервенција на Москва во Украина.
„Во врска со потпишувањето на договорот за деблокирање на украинските пристаништа за извоз на жито, работата е обновена во пристаништата Одеса, Черноморск и Пивдењи“, соопшти украинската морнарица на социјалните мрежи.
Минатата недела, Киев и Москва потпишаа договор со посредство на Туркије за да се овозможи извоз на блокираното украинско жито од трите пристаништа.
Украина во понеделникот посочи дека извозот може да се рестартира уште „оваа недела“.
Морнарицата во соопштението посочи дека кога извозот ќе продолжи, товарните бродови ќе бидат придружувани до и од пристаништата.
„Влезот и излезот на бродовите до поморските пристаништа ќе се врши со формирање на конвој што ќе го придружува водечкиот брод“, се вели во соопштението, додавајќи дека сè уште се утврдуваат безбедни рути.
Заеднички координативен центар
Туркије официјално отвори заеднички координативен центар како дел од договорот на церемонија во Истанбул во средата.
„Центарот се состои од пет претставници - и воени и цивилни - од Туркије, Русија, Украина и ОН. На терен нема да има воен елемент“, изјави турскиот министер за одбрана Хулуси Акар на прес конференцијата.
Русија и Украина се главни извозници на земјоделски производи, но војната на Москва сериозно го наруши извозот на украинските житарки бидејќи борбите ги оштетија жетвите и ги оставија пристаништата блокирани и минирани.
