Хусам Абу Сафије, директор на болницата „Камал Адван“ во градот Беит Лахија на северот на Газа, стана еден од симболите на отпорот против израелската окупација во Појасот Газа.
„Камал Адван“, една од ретките болници што беше во функција на северот на Газа, повторно беше нападната од израелски војници на 27 декември.
Израелските сили ја опколија болницата Камал Адван на 27 декември, принудувајќи ги пациентите и медицинските тимови да се евакуираат под артилериски оган.
По евакуацијата, болницата била запалена, при што е уништена нејзината опрема и капацитети.
Израелските сили го приведоа директорот на болницата Абу Сафије и одведоа десетици медицински персонал во центарот на сослушување.
Абу Сафије до последен момент не ги остави пациентите и колегите, се бореше да ја одржи болницата во функција и покрај израелските напади.
Фотографиите на Абу Сафије од 27 декември како оди кон израелските тенкови во бел мантил го обиколија светот. Овој херој во бело стана симбол на отпорот на израелската окупација на Газа.
Ова беше една од последните слики на Абу Сафије пред израелските војници да го приведат и да го однесат на непозната локација.
Сѐ уште нема информации за тоа каде се наоѓа Абу Сафије, ниту за неговото здравје.
Абу Сафије, кој не ги оставил пациентите и колегите, иако си го ризикувал животот, е роден на 21 ноември 1973 година во бегалскиот камп Џабалија во северниот дел на Газа.
Семејството на Абу Сафија, познат и како Абу Илјас, беше насилно раселено од Ашкелон во 1948 година и најде засолниште во Газа.
Абу Сафије е познат како еден од водечките педијатри во Газа.
Како и секој Палестинец, тој плати висока цена во израелските напади врз Газа од 7 октомври 2023 година.
Неговиот син Ибрахим беше убиен во израелскиот напад врз болницата „Камал Адван“ на 26 октомври минатата година.
И покрај семејната трагедија, тој продолжи да ја извршува својата должност и да им помага на Палестинците во Газа.
Абу Сафија беше повреден за време на напад на израелската армија врз болницата на 23 ноември.
„Ова нема да не спречи. Повреден сум таму каде што работам и ми е чест. Мојата крв не е повредна од крвта на моите колеги или луѓето на кои им служиме. Ќе се вратам кај моите пациенти штом заздравам“, тој рече тогаш.
За време на копнените напади на израелската армија кои започнаа на 6 октомври и продолжија, Абу Сафија многупати повикуваше на помош.
Меѓутоа, додека светот молчеше на апелите на палестинскиот лекар, израелските војници на 27 декември упаднаа во болницата со тенкови и оклопни возила.
„Камал Адван“, една од ретките болници која беше прибежиште за повредените и болните во Газа, сега веќе не работи.
