Египетска делегација денеска се очекува да пристигне во Тел Авив за да го претстави предлогот за договор за размена на заложници и прекин на огнот во Газа.
Нивниот план предвидува примирје што ќе трае месец или два, со постепено ослободување на заложниците, при што првенствено ќе бидат ослободени постарите или болните лица, пишува „Тајмс оф Израел“.
Египетските власти ќе побараат на Хамас да му се даде период од неколку дена по почетокот на прекинот на огнот за да обезбеди список со живите заложници.
Планот предвидува и брзо отворање на преминот Рафах меѓу Египет и Газа, под надзор на палестинската управа, со египетска контрола.
Израел ќе има право да стави вето на преминувањето на луѓе во Египет, додека Египет ќе гарантира дека Хамас нема да има контрола врз преминот или врз Појасот Газа „во наредниот период“.
Договорот вклучува и зголемување на хуманитарната помош за Газа, како и медицинска помош за заложниците на кои им е потребна.
Според извештајот, на Израел првично ќе му биде дозволено да ги задржи своите воени позиции во Газа, но без да спроведува воени операции.
Иако не е експлицитно споменато, се претпоставува дека договорот би можел да вклучи ослободување на палестинските затвореници.
