Турскиот претседател Реџеп Таип Ердоган ја повика меѓународната заедница да преземе конкретни чекори против израелската „суровост и варварство“ во Газа, наместо да го одложува напредокот со празна реторика.
„Израел нѐ почна денес да ги коле Палестинците. Ова има историја која датира од 1947 година“, им рече Ердоган на новинарите во четвртокот на враќање од Узбекистан од самитот на Организацијата за економска соработка.
Турскиот претседател, исто така, го пофали шефот на ОН Антонио Гутереш во врска со неговиот став за злосторствата на Израел.
„И тој ја виде и ја гледа вистината. Како генерален секретар на Обединетите нации, тој стои зад правите и праведните“, рече тој.
И покрај тоа што го критикуваше Западот, особено Соединетите Американски Држави дека застанаа зад Израел по ескалацијата на конфликтот на 7. октомври, Ердоган потсети дека 120 земји во ОН одбија да застанат со Израел и САД, наспроти 45-те кои беа воздржани и 14-те кои го поддржаа.
Нагласувајќи дека мнозинството земји зазедоа став против злосторствата на Израел, Ердоган рече:
„Овие храбри земји испраќаат порака до целиот свет. О Америка, колку и да сте големи, не сте во право, Израел не е во право“.
Ердоган, исто така, го критикуваше Западот за тврдењето дека „се стреми кон вистинскиот стратешки пат“ кога застана зад Израел, велејќи:
„Кој е подобар патоказ од резолуциите на ОН? Ако сте искрени за прекинот на огнот, вршете притисок врз Израел да ги спроведе одлуките на ОН“.
„Луѓето умираат, мајките ги губат своите бебиња, децата ги губат своите родители. Се обидуваме да направиме нешто за да ја запреме оваа рана што крвари. Ако САД почнат да го споделуваат ова чувство, ќе стане уште полесно да се запре Израел“, додаде тој.
