Целосното вклучување на Туркије во одбранбените напори на ЕУ е суштинско за мирот и безбедноста на Европа, рече денеска турскиот претседател Реџеп Таип Ердоган во обраќањето на петтиот самит на Европската политичка заедница во Будимпешта.
„Нема разумно оправдување за блокирање на процесот на пристапување во ЕУ на земја кандидат како Туркије, која долго време дава значителен придонес за просперитетот и безбедноста на Европа”, истакна Ердоган.
Тој смета дека негативните последици од војната во Украина се продлабочуваат со секој изминат ден и дека продолжувањето на војната остава се помалку простор за дипломатија.
Турскиот претседател рече дека ги пренел пораките на Анкара за отворање простор за дипломатија на одделни состаноци со неговиот руски колега Владимир Путин и украинскиот министер за надворешни работи Андриј Сибиха во последните неколку недели.
Европските лидери присуствуваат на петтиот самит на Европската политичка заедница за да разговараат за глобалните прашања, вклучувајќи ги Украина и Блискиот Исток, нерегуларната миграција и прашања поврзани со економската безбедност на Европа
Домаќин на состанокот е унгарскиот премиер Виктор Орбан.
