Турскиот претседател Реџеп Таип Ердоган во вторникот изрази надеж дека новата администрација во Сирија по падот на режимот на Асад ќе заземе пристап кој „ги вклучува сите сегменти на сирискиот народ“.
Во своето обраќање на 15. Амбасадорска конференција во турската престолнина Анкара, Ердоган рече дека верува оти граѓаните на Сирија ќе бидат успешни во наредниот период.
„Со сето срце веруваме дека нашите сириски браќа и сестри, кои ја добија војната против суровиот режим чии раце се крвави, на крајот ќе бидат успешни“, додаде тој.
Тој го коментираше и израелскиот геноцид во Газа, истакнувајќи дека Туркије е подготвена да ги направи сите можни напори за „да го запре морето од крв во Газа“.
„Сакам јасно да кажам дека патот на кој инсистира и тврдоглаво се придржува израелската влада не е вистинскиот пат“, рече Ердоган, потсетувајќи дека Анкара постојано ја нагласува потребата од постојан прекин на огнот во Газа во последните 14 месеци.
Тој се осврна и на односите меѓу Туркије и Ирак, истакнувајќи дека официјална Анкара смета дека територијалниот интегритет и суверенитет на Ирак се „многу важни“.
Ердоган рече и дека заедничката борба на земјите против терористичката група ПКК, која ја загрозува нивната безбедност и опстанок, ќе продолжи.
Тој се осврна и на напорите за постигнување мировен договор меѓу јужнокавкаските соседи на Азербејџан и Ерменија.
Тој истакна дека Туркије се надева дека „историската можност“ дадена со ослободувањето на регионот Карабах од окупација минатата есен ќе биде крунисана со мировен договор меѓу Азербејџан и Ерменија.
