Турскиот претседател Реџеп Таип Ердоган рече дека на дневен ред на Самитот на лидерите на НАТО во Вашингтон ќе го стави масакрот врз палестинскиот народ во Појасот Газа, каде што се тестира искреноста на заедничките вредности на Алијансата.
Ердоган отпатува во Вашингтон на Самитот на лидерите на НАТО, кој се одржува по повод 75-годишнината од основањето на таа Алијанса, а на аеродромот „Есенбога“ во Анкара за новинарите изјави дека планира да одржи консултации со цел зајакнување на структурата на одвраќање и одбрана на НАТО и јакнење на средствата и способностите на сојузниците.
Тој додаде дека на Самитот ќе присуствуваат лидерите на Европската Унија, Австралија, Јужна Кореја, Јапонија, Нов Зеланд, Украина и други партнери од НАТО.
„Нашето очекување од Самитот е да се добијат резултати што ќе ја земат предвид националната безбедносна чувствителност на сојузниците и ќе ги зајакнат солидарноста и духот на единството. Во таа насока важно е да се спроведат одлуките што ги донесовме во Вилнус во однос на борбата против тероризмот и отстранување на бариерите за трговијата во одбранбената индустрија меѓу сојузниците. Исто така, ќе нагласиме дека напорите на НАТО мора да се зголемат во водењето одлучна и сеопфатна борба против терористичките организации“, рече Ердоган.
Нагласувајќи дека Туркије ги почитува и поддржува интегритетот и суверенитетот на Украина, Ердоган рече дека ќе продолжи да се залага за принципиелен став дека мирот може да се постигне со мирни средства и дека НАТО не треба да стане страна во војната.
„Од првиот ден тврдиме дека ќе нема губитници во праведен мир. За таа цел, од самиот почеток презедовме одговорност да обезбедиме прекин на огнот, го инициравме Истанбулскиот процес за да го отвориме патот за траен мир. Денот кога оружјето зборува, тече крв, а животите се губат покажува колку правилен став сме зазеле“, порача Ердоган.
Турскиот претседател Ердоган изјави дека масакрите извршени од израелските сили во блокираниот Појас Газа ќе ги стави на дневен ред на Самитот на НАТО во Вашингтон.
„Ќе нагласиме дека меѓународната заедница не направила доволно за да го запре Израел во оваа страшна ситуација и дека глобалната совест нема да може да здивне без воспоставување праведен и траен мир во Палестина“, рече Ердоган.
Ердоган рече и дека Туркије внимателно ги следи преговорите што се водат во Катар за прекин на огнот во Појасот Газа.
„Трпеливо го следиме процесот. Нашиот шеф на разузнавањето и нашиот министер за надворешни работи го следат. Се надевам дека наскоро ќе го добиеме посакуваниот исход“, рече Ердоган.
Нагласувајќи дека Туркије ќе продолжи да ја зајакнува својата улога во НАТО, во која е меѓу првите пет членки по придонес во колективната безбедност, Ердоган рече дека се надева дека со новоизбраниот генерален секретар на НАТО, Марк Рут, ќе ја продолжи отворената и искрена соработка што ја имал и со шефот на Aлијансата во заминување, Јенс Столтенберг.
