Претседателот на Туркије Реџеп Таип Ердоган во говорот на единаесеттиот самит на Д-8 во Каиро повика на глобално единство, правда и напори за обнова на Сирија. Тој предупреди на ескалација на глобалните конфликти и предизвиците во одржувањето на безбедноста и стабилноста.
„За жал, во услови на зголемени конфликти, кризи и војни, институциите одговорни за обезбедување на глобалната безбедност и стабилност не ги исполнуваат своите должности“, нагласи Ердоган.
Тој ја истакна потребата од посилна меѓународна соработка и исто така го пофали неодамнешниот напредок во организацијата Д-8, поздравувајќи го одобрувањето на трговскиот пакт со Египет.
„Со оглед на тоа што Египет го одобри и преференцијалниот трговски договор, сега ќе биде можно да се спроведе договорот во многу пошироки размери“, рече Ердоган, истакнувајќи го потенцијалот за проширување на економските врски меѓу земјите-членки.
Тој ја истакна потребата од поефективно искористување на ресурсите на земјите од Д-8 на полето на економската соработка.
Турскиот претседател понатаму укажа на важноста од вклучување на помалку развиените нации во глобалните иницијативи.
„Нашата цел е да придонесеме за глобалната правда и развој со вклучување на најмалку развиените земји во ТЕКНОФЕСТ, најголемиот светски авијациски и вселенски фестивал“, рече Ердоган, нагласувајќи ја важната улога на турскиот фестивал во промовирањето на технолошкиот напредок.
Во однос на регионалните прашања, Ердоган го поздрави пристапот на Азербејџан во групата Д-8, нарекувајќи го значаен чекор за силата на таа организација, која речиси четврт век собра осум земји во развој со цел зајакнување на економската соработка, имено Туркије, Пакистан, Бангладеш, Египет, Индонезија, Иран, Нигерија и Малезија.
„Со Азербејџан, кој направи значителен напредок во последните години и се приклучи на нашата организација, денес сме посилни отколку во минатото“, рече Ердоган.
Зборувајќи за ситуацијата во Сирија по соборувањето на режимот на Башар ал Асад, Ердоган повика на солидарност во обновата на земјата која беше уништена во изминатите 13 години граѓанска војна.
„На народот во Сирија им треба единство и помош за обнова на земјата која е уморна од војна. Како нивни соседи и браќа, ние се обидуваме да придонесеме во овие напори“, рече турскиот претседател.
Тој додаде дека крајната цел треба да биде мирот и соживотот во Сирија.
„Изградбата на Сирија ослободена од тероризам, во која сите верски и етнички групи живеат во мир, е нашето најискрено очекување“, рече Ердоган.
